ABŞ-lı rəsmi hərbi qarşıdurmaların kəskinləşə biləcəyi barədə xəbərdarlıq edib. O, İran vətəndaşlarını İslam İnqilabı Keşikçiləri Korpusunun (SEPAH) mərkəzlərindən və qüvvələrindən uzaq durmağa, gərginlik artacağı təqdirdə isə evlərində qalmağa çağırıb.
Amerikalı rəsmi noyabrın 6-da, cümə günü axşam saatlarında bildirib ki, İnqilab Keşikçiləri Korpusu silahlarını və komandanlıq mərkəzlərini yaşayış məhəllələrində və insanların evlərinin yaxınlığında yerləşdirib.
O, Keşikçilər Korpusunun komandirlərini və İslam Respublikasının rəhbərlərini mülki şəxslərdən «canlı qalxan» kimi istifadə etməkdə ittiham edib. Rəsminin sözlərinə görə, onlar vətəndaşların həyatını təhlükəyə atdıqları halda özləri yeraltı sığınacaqlarda gizləniblər.
Rəsmi vurğulayıb ki, Vaşinqton İran xalqının təhlükəsizliyindən narahatdır və bu xəbərdarlıqlar hərbi qarşıdurmalar yenidən başlayacağı halda mülki şəxsləri qorumaq məqsədi daşıyır.
Bu açıqlamalar ABŞ-ın İslam Respublikasına qarşı yeni hücum dalğasına başlaması ehtimalının hələ də gündəmdə qaldığı bir vaxtda səslənib. Bununla belə, amerikalı rəsmi hücumlarla bağlı qəti qərar və ya onların mümkün vaxtı barədə heç nə deməyib.
