İslam Respublikasının məhkəmə hakimiyyətinin rəhbəri Qulamhüseyn Möhseni-Ejei ABŞ-dakı seçkilərin nəticələrinə münasibət bildirərək sosial şəbəkələrdə paylaşdığı açıqlamada Donald Trampın həm müharibədə, həm də siyasət meydanında məğlub olduğunu iddia edib. O, İslam Respublikasının Trampa daha çox məğlubiyyət yaşadacağını bildirib.
Möhseni-Ejei noyabrın 4-də (13 aban) paylaşdığı mesajında yazıb: «Tramp həm müharibədə, həm də siyasətdə məğlub oldu. Ona mütləq daha çox məğlubiyyət yaşadacağıq. Bu, hələ sübh çağının nəticələridir».
İslam Respublikasının məhkəmə hakimiyyətinin rəhbəri mesajının davamında 13 abanı (4 noyabr) amerikalıların məğlubiyyət günü adlandırıb.
Bu açıqlamalar İslam Respublikası rəsmilərinin ABŞ-a qarşı qarşıdurma və qələbə ritorikasını vurğulamağa davam etdiyi və Vaşinqtonun daha çox məğlubiyyətə uğrayacağından danışdığı bir vaxtda səslənir.
