Oktyabrın 27-də keçirilən seçkilərdən və Benyamin Netanyahunun parlament çoxluğunu itirməsindən sonra İsrail prezidenti İsaak Hersoq ölkəni siyasi dalandan çıxarmaq və geniş tərkibli hökumət yaratmaq üçün səylərə başlayıb.
Reuters-in məlumatına görə, Netanyahu seçkilərdə proqnozlaşdırılandan daha yaxşı nəticə göstərsə də, hökumət qurmaq üçün zəruri çoxluğu əldə edə bilməyib. Onun rəqiblərinin də kabinet formalaşdırmaq üçün aydın yolu yoxdur.
İsrailin 66 yaşlı prezidenti Hersoq hökumətin formalaşdırılması mandatını Netanyahuya, yoxsa onun rəqibi Qadi Ayzenkota həvalə edəcəyi barədə hələ qərar verməyib.
Hersoqun keçmiş müşavirlərinin sözlərinə görə, o, İsraildə daxili parçalanmaların dərinləşməsindən narahatdır və çox güman ki, rəqib partiyalar arasında milli birlik hökumətinin yaradılmasına çalışacaq.
Reuters həmçinin xəbər verib ki, Donald Trampın maliyyə korrupsiyası işi üzrə Netanyahunun əfv olunması ilə bağlı müraciəti siyasi danışıqların mövzularından birinə çevrilə bilər. Lakin Hersoq indiyədək bu müraciətə müqavimət göstərib.
Siyasi ekspertlər xəbərdarlıq ediblər ki, partiyalar arasındakı dərin fikir ayrılıqları yeni hökumətin qurulmasını çətinləşdirə və təkrar seçkilərin keçirilməsi ehtimalını gündəmə gətirə bilər.
