İranın sərbəst bazarında dolların qiyməti 256 min tümən həddini aşaraq yeni rekordlar qırdığı bir vaxtda İslam Respublikasının Mərkəzi Bankı yaydığı bəyanatda valyuta məzənnəsinin hazırkı səviyyəsinin «iqtisadiyyatın fundamental göstəricilərinə» uyğun gəlmədiyini və qiymət sıçrayışının mühüm hissəsinin psixoloji təzyiqlərdən və bazar gözləntilərindən qaynaqlandığını iddia edib.
Mərkəzi Bank bəyanatında «müdaxilə alətlərindən» istifadə etməklə valyuta bazarını iqtisadi reallıqlara daha uyğun istiqamətə qaytaracağını vəd edib. Bununla belə, oxşar siyasət ötən illərdə də dəfələrlə həyata keçirilsə də, valyuta bazarında yeni rekordların qeydə alınmasının qarşısını ala bilməyib.
Mərkəzi Bank həmçinin valyuta bazarındakı proseslərin daim izləndiyini və zərurət yarandığı təqdirdə «pul və valyuta sabitliyinin qorunması» üçün işə qarışacağını bəyan edib.
Mərkəzi Bankın bu açıqlamaları valyuta bazarında son aylarda dəfələrlə yeni rekordların qeydə alındığı və milli valyutanın dəyərinin tarixin ən aşağı səviyyələrinə düşdüyü bir vaxtda səslənir.
