ABŞ prezidenti Donald Tramp İslam Respublikasına qarşı təhdidlərini bir daha təkrarlayıb və «İranı məhv etmək» ehtimalını istisna etmədiyini deyib. Tramp «sülh prezidenti» olduğunu iddia etdiyi halda belə mövqe tutmasını necə izah etdiyi ilə bağlı suala belə cavab verib: «Düşünmürəm ki, İranla bağlı nə vaxtsa sülhə nail olmaq mümkün olsun». O, eyni zamanda Tehranla «real razılaşma» istədiyini vurğulayıb.
Tramp həmçinin Tehranın münaqişəyə son qoymaq üçün irəli sürdüyü son təklifə də toxunub. Onun sözlərinə görə, iranlılar Hörmüz boğazını yenidən açmağı təklif ediblər, lakin bu, Vaşinqton üçün kifayət etməyib. «Demək olar ki, kifayət idi, amma tam yox», – deyə o bildirib. ABŞ prezidenti daha əvvəl Tehranın təqdim etdiyi atəşkəs təklifini rədd etmişdi.
ABŞ-da aralıq seçkilərindən sonra İranın bombalanmasının gücləndirilməsi ehtimalı ilə bağlı suala isə Tramp «Ola bilər» deyə cavab verib. O, hərbi planlarla bağlı əlavə açıqlama verməkdən imtina edib. Lakin ABŞ-ın son altı ay ərzində sursat ehtiyatlarını və silah istehsalı gücünü artırmağa davam etdiyini bildirib.
