Yaxın Şərqin enerji ixracı üçün həyati əhəmiyyət kəsb edən marşrutlarda təhlükəsizlik riskinin artması fonunda Brent markalı neftin qiyməti üç faizdən çox bahalaşaraq bir barreli 107,81 dollara çatıb.
Reuters agentliyinin yazdığına görə, İran rejiminin dəstəklədiyi husilərin Bab əl-Məndəb boğazına doğru irəliləməsi və onların Səudiyyə gəmilərinə qarşı hədələri regionun ikinci əsas neft nəqliyyat dəhlizində fasilə yaranması ilə bağlı narahatlığı artırıb. Neft tankerlərinin Afrikanı dolanması səyahət müddətinə təxminən 22 gün əlavə edir, daşınma xərcləri isə yeni rekord səviyyələrə çatıb.
Eyni zamanda, gündə təxminən dörd-beş milyon barrel neft daşıyan və Hörmüzə ən mühüm alternativ marşrut sayılan Səudiyyə Ərəbistanının Şərq–Qərb neft kəməri İraq ərazisindən həyata keçirilən pilotsuz uçuş aparatı hücumunun hədəfinə çevrilib.
İran ilə Körfəz ölkələri arasında Hörmüzdə təhlükəsiz marşrutun yaradılması ilə bağlı planlaşdırılan görüşün təxirə salınması da bazara əlavə təzyiq göstərib; ABŞ neftinin qiyməti isə təxminən üç faiz artaraq 102,94 dollara yüksəlib.
