İran İslam Respublikasının Atom Enerjisi Təşkilatının rəhbəri Məhəmməd İslami bildirib ki, müharibə şəraiti üçün xüsusi təlimat hazırlanana qədər Beynəlxalq Atom Enerjisi Agentliyinin müfəttişlərinə zərbə endirilmiş nüvə obyektlərinə giriş icazəsi verilməyəcək.
İslami müharibə şəraitinə və parlamentin qərarına istinad edərək əlavə edib ki, son bir ayda Agentliyin yoxlamaları yalnız zərbəyə məruz qalmamış obyektlərdə həyata keçirilib.
Bu mövqe yeni deyil, İslami əvvəllər də deyib ki, zərər görmüş obyektlərə baxış təhlükəsizlik, ekoloji və texniki risklərin qiymətləndirilməsi üçün xüsusi protokol tələb edir. Agentlik hazırkı vaxtadək Nətənz, Fordo və İsfahan da daxil olmaqla, hədəf alınmış əsas obyektlərə giriş əldə edə bilməyib.
Agentliyin baş direktoru Rafael Qrossi isə əksinə vurğulayıb ki, İranın daxili qanunları Tehranın Nüvə Silahlarının Yayılmaması Müqaviləsi çərçivəsindəki beynəlxalq öhdəliklərini ləğv edə bilməz. Yoxlamaların davam edən şəkildə əngəllənməsi Agentliyi İranın nüvə obyektlərinin və materiallarının vəziyyətini təsdiqləmək imkanından məhrum edib.
