ABŞ və Çin arasındakı rəqabət artıq təkcə ticarət və silahlanma sahəsi ilə məhdudlaşmır; süni intellekt iki ölkənin güc nümayişi üçün ən mühüm meydanlardan birinə çevrilib.
ABŞ-ın Demokrat Partiyasından olan senator Con Fetterman xəbərdarlıq edib ki, süni intellekt ətrafında qorxu yaratmaq və məlumat mərkəzlərinin tikintisinin qarşısını almaq nəticədə Çinin xeyrinə olacaq. O bildirib ki, süni intellekt və enerji sahəsində üstünlük ABŞ-ın milli təhlükəsizliyi üçün zəruridir.
Məlumat mərkəzləri güclü kompüterlərdən ibarət böyük komplekslərdir və süni intellekt məhz orada öyrədilir və fəaliyyət göstərir. Bu mərkəzlər çoxlu elektrik enerjisi və su istehlak etdiyi üçün bəzi vətəndaşların etirazı ilə üzləşib.
Eyni zamanda, Semafor nəşrinin hesabatına görə, ABŞ modelləri hələ də daha güclüdür; lakin Çin şirkətləri daha sürətlə inkişaf edir və daha ucuz süni intellekt xidmətləri təklif edirlər. Fetterman bildirib ki, bu sənayeni məhdudlaşdırmaq ABŞ-ın üstünlüyünü Çinə verə bilər.
