Türk soylu siyasi və vətəndaş fəallarından, akademik dairə nümayəndələrindən və ziyalılardan ibarət bir qrup yaydığı bəyanatda İranda azərbaycanlıların həbslərinin artmasından, ağır hökmlərdən və siyasi, mülki-ictimai və mədəni fəaliyyətlərinə qoyulan məhdudiyyətlərdən narahatlıqlarını bildirib.
Təbriz Tədqiqat Mərkəzinin məlumatına görə, bəyanatda deyilir ki, son bir il ərzində müxtəlif ostanlarda çoxlu sayda azərbaycanlı fəal həbs edilib və ya zindana salınıb, bir qismi isə təhlükəsizliklə bağlı ittihamlarla uzunmüddətli həbs cəzalarına məhkum olunub. Bəyanatı imzalayanlar həmçinin bəzi məhkumların vəkilə effektiv çıxışdan məhrum edilməsinə, təhlükəsizlik təzyiqlərinə və məhbusların tibbi vəziyyətinə etirazlarını bildiriblər.
Bəyanata əsasən, Araz Əman, Ayaz Seyfxah, Ayət Mehrəlibəyli (Yürüş), Əmin Təqizadə, Baqir Hacızadə, Rza Səlimi, Salar Tahir Əfşar, Siyamək Mirzəyi, Səməd Heydəri, Tahir Nəqəvi, Abbas Lisani, Əbdüləziz Əzimi Qədim, Əsgər Əkbərzadə, Əli Babayi, Əli Vasiqi, Fatimə Atəşi Xiyavi, Kərəm Mərdanə, Məhəmməd Məliki, Mahmud Ocaqlu, Mürtəza Pərvin, Vədud Əsədi və Yusif Kari bəyanatın hazırlandığı vaxt həbsdə olan fəallar sırasındadır.
Bundan əlavə, onlarla digər fəal girov əsasında azadlıqdadır və məhkəmə mərhələsindədir, yaxud onların hökmləri qətiləşərək icra ərəfəsindədir.
Bəyanatı imzalayanlar sonda BMT-nin xüsusi məruzəçilərindən və həqiqətaraşdırma missiyasından, dövlətlərdən və beynəlxalq insan haqları təşkilatlarından azərbaycanlı məhbusların vəziyyətini və onların işlərinə baxılma prosesini izləmələrini, ədalətli məhkəmə araşdırmasını, sağlamlıqlarını və ləyaqətlərini təmin etmək üçün addım atmalarını tələb ediblər.
