ABŞ Xəzinə Nazirliyi İranın neftinin daşınması və satışı ilə bağlı 20-dən çox şəxs, şirkət və gəmini sanksiya siyahısına daxil etdiyini açıqlayıb.

Nazirliyin məlumatına görə, bu şəbəkə İranın keçmiş təhlükəsizlik rəsmisi Əli Şəmxaninin oğlu Məhəmməd Hüseyn Şəmxani tərəfindən idarə olunur və İranın sanksiyalardan yayınaraq qlobal bazarlarda neft satmasında mühüm rol oynayır.

Bəyanatda qeyd olunur ki, bu şəbəkə örtülü şirkətlər və neft tankerlərindən ibarət donanma vasitəsilə həm İran, həm də Rusiya neftinin daşınmasına kömək edib və milyardlarla dollar gəlir əldə edib.

Eyni zamanda, ABŞ Hizbullahla əlaqəli bir maliyyə şəbəkəsini də sanksiya edib. Rəsmilərin bildirdiyinə görə, bu şəbəkə İran neftini qızıl ilə mübadilə edərək Hizbullah və İran İnqilab Keşikçiləri Korpusunun maliyyə resurslarını təmin edib.

ABŞ Xəzinə Nazirliyi vurğulayıb ki, bu addımlar İranın və onun müttəfiq qruplarının maliyyə resurslarını məhdudlaşdırmaq məqsədi daşıyan “maksimum təzyiq” siyasətinin davamı çərçivəsində həyata keçirilir.