Azərbaycan Respublikasının İrandakı səfirliyi 12 aprel 2026-cı il tarixində rəsmi olaraq fəaliyyətini yenidən bərpa edib. Bu addım bölgədə hərbi toqquşmaların dayanması və iki həftəlik atəşkəsin elan edilməsindən sonra atılıb.

Yayımlanan məlumatda bildirilir ki, səfirlik ilkin mərhələdə səfir və məhdud sayda diplomatik və inzibati əməkdaşın iştirakı ilə fəaliyyət göstərəcək. Həmçinin qeyd olunub ki, təhlükəsizlik məsələləri və təşkilati amillər nəzərə alınaraq, səfirliyin fəaliyyətinin genişləndirilməsi prosesi mərhələli şəkildə həyata keçiriləcək.

Azərbaycan rəsmiləri bu addımı İranla münasibətlərin əhəmiyyətinin göstəricisi kimi qiymətləndirib və vurğulayıblar ki, Tehran qonşu və dost ölkə kimi Bakının xarici siyasətində xüsusi yer tutur.

Bəyanatda həmçinin Azərbaycan Respublikasının bölgədə davamlı sülh və sabitliyin təmin olunmasına yönəlmiş regional təşəbbüsləri dəstəklədiyi vurğulanıb.