NATO-nun baş katibi bildirib ki, alyansa üzv ölkələr demək olar ki, istisnasız olaraq İranla müharibə fonunda Donald Trampın tələblərini həyata keçirir.

Araz News-un məlumatına görə, Reuters-ə istinadən Rutte qeyd edib ki, bəzi müttəfiqlər əvvəlcə ABŞ-a logistika və hərbi dəstək göstərməkdə “yavaş” davransalar da, hazırda Avropa ölkələri “geniş dəstək” təqdim edir və Trampın çağırışlarına cavab verirlər.

O, həmçinin vurğulayıb ki, Tramp ilk hücumların sürpriz effektini qorumaq üçün müttəfiqləri əvvəlcədən məlumatlandırmayıb. Bu açıqlamalar Rutte ilə Tramp arasında keçirilən görüşdən sonra səsləndirilib.

Məlumata əsasən, Tramp NATO müttəfiqlərindən yaxın günlərdə Hörmüz boğazının təhlükəsizliyinə dəstək üçün konkret öhdəliklər təqdim etmələrini istəyib.

Tramp daha əvvəl NATO-nu İranla müharibədə ABŞ-ı dəstəkləməməkdə ittiham etmiş və Ağ Ev onun alyansın bu sınaqdan uğursuz çıxdığını düşündüyünü açıqlamışdı.