Bağdad Kürdüstan Regional Hökumətinə xəbərdarlıq edib ki, əgər kürd qrupları İranla münaqişəyə qoşularsa, İraq ordusu İran sərhədinə qüvvə yerləşdirə bilər.

ArazNews-un məlumatına görə, İraq federal hökuməti Kürdüstan Regional Hökumətinə bildirib ki, kürd qruplarının İranla müharibəyə qoşulmasına imkan verilməməlidir. İraq rəsmiləri kürd tərəfinə xəbərdarlıq ediblər ki, əgər bunun qarşısı alınmasa, federal qüvvələr sərhəd bölgələrində nəzarəti təmin etmək üçün hərəkətə keçə bilər.

İraq, kürd və Türkiyə rəsmiləri «Middle East Eye» nəşrinə bildiriblər ki, Bağdad bu xəbərdarlığı həftənin əvvəlində, Vaşinqtonun kürd qruplarını ABŞ və İsrailin İrana qarşı müharibəsinə qoşulmağa təşviq edə biləcəyi ilə bağlı artan narahatlıqlar fonunda çatdırıb.

Məsələ ilə bağlı məlumatlı bir İraq rəsmisi deyib: “Bağdadın mesajı aydın idi: kürd qrupları İran məsələlərinə qarışmamalıdır. Əgər Kürdüstan Regional Hökuməti buna mane ola bilməsə, İraqın federal qüvvələri sərhəd təhlükəsizliyini təmin etmək üçün müdaxilə edəcək.”

Kürd və türk mənbələri də MEE ilə söhbətdə bu xəbərdarlığı təsdiqləyiblər və bildiriblər ki, Kürdüstan Regional Hökuməti gərginliyin artmasının qarşısını almaq üçün Bağdad və qonşu ölkələrin ciddi təzyiqi altındadır. Çünki İran kürd silahlı qruplarının sərhədin o tayında əməliyyatlara başlaya biləcəyi ilə bağlı ehtimallar artır.

Bununla yanaşı, iki kürd silahlı qrup — PJAK və Kürdüstan Demokrat Partiyası — müharibəyə qoşulmayacaqlarını qəti şəkildə təkzib etməyiblər. PJAK çərşənbə günü yaydığı bəyanatda İranın qərbində yaşayan kürdləri bəzi bölgələrdə İran dövlətinin geri çəkildiyi barədə yayılan xəbərlər nəticəsində yaranan boşluğu doldurmaq üçün yerli komitələr yaratmağa çağırıb.