ABŞ prezidenti Donald Tramp CBS News kanalına telefon müsahibəsində bildirib ki, İran İslam Respublikası ilə müharibə yaxın zamanda başa çata bilər. O deyib ki, müharibə “demək olar ki, tam bitib” və iddia edib ki, İranın artıq effektiv dəniz qüvvəsi qalmayıb, rabitə sistemi sıradan çıxıb və hava qüvvələri də demək olar ki, məhv edilib. Tramp əlavə edib ki, ABŞ ilkin olaraq proqnozlaşdırılan 4–5 həftəlik vaxt cədvəlindən daha sürətli irəliləyir.

Tramp İranın yeni rəhbəri Müctəba Xamenei barədə suala cavab verərkən bildirib ki, onun üçün heç bir mesajı yoxdur. O həmçinin qeyd edib ki, İran rəhbərliyinin yerinə keçə biləcək bir şəxsi nəzərində saxlayır, lakin bu barədə əlavə detal açıqlamayıb.

ABŞ prezidenti müsahibənin başqa bir hissəsində Hörmüz boğazına da toxunaraq bildirib ki, hazırda gəmilər bu boğazdan keçməkdə davam edir, lakin Vaşinqton həmin boğazı “nəzarətə götürmək” ehtimalını nəzərdən keçirir.

Tramp sonda İran İslam Respublikasına xəbərdarlıq edərək deyib: “Onlar malik olduqları hər şeyi artıq atıblar və yaxşı olar ki, başqa addım atmasınlar. Əks halda bu ölkənin sonu olacaq.”