Son peyk monitorinqləri Ərdəbil vilayətində yerləşən Suha gölü ətrafında meşə örtüyünün ciddi şəkildə azaldığını göstərib və son illərdə genişmiqyaslı torpaq dəyişikliklərinə işarə edib.

Araz News-un məlumatına görə, IRNA-nın yazdığına əsasən İran Kosmik Tədqiqatlar Mərkəzi “Xəyyam” peyk görüntülərinin 2016 və 2025-ci illər üzrə müqayisəli analizində göl ətrafındakı meşələrin əhəmiyyətli hissəsində bitki örtüyünün sıxlığının azaldığını müəyyən edib. Bəzi ərazilərdə ağac kəsiminin izləri açıq şəkildə görünür, insan müdaxiləsi və torpaq istifadəsinin dəyişməsi əlamətləri qeydə alınıb.

Bu monitorinq meşə ərazilərində mümkün dağıntıların dinamikasını izləmək və uzunmüddətli dəyişiklikləri qiymətləndirmək məqsədilə aparılıb. Mütəxəssislər məsafədən zondlama texnologiyalarının ekoloji dağıntıların daha dəqiq izlənməsi və idarəetmə qərarlarının verilməsi üçün vacib olduğunu bildirirlər.

Son illərdə ekoloji fəallar Güney Azərbaycanda bataqlıqların və göllərin qurudulması, torpaq dəyişiklikləri və ekoloji qiymətləndirmə olmadan həyata keçirilən layihələr barədə dəfələrlə xəbərdarlıq ediblər. Ekspertlər bu prosesin davam etməsinin regionun ekoloji balansına və yerli icmaların dolanışığına ciddi təhlükə yarada biləcəyini qeyd edirlər.