National Interest nəşri bir təhlildə yazdı ki, Ali Xameneidən sonra İranda hakimiyyətin ötürülməsinin ilk mərhələsi böyük ehtimalla Sepah-ın idarəsi altında baş verəcək və dərhal xalq yönlü dəyişiklik formatında olmayacaq.

Araz News-un xəbərinə görə, təhlildə bildirilir ki, hakimiyyət strukturunun qəfil çökməsi barədə yayğın təsəvvürlərin əksinə olaraq, Xameneidən sonrakı dövr sakit bir inqilabdan çox, təhlükəsizlik strukturu daxilində rəqabət və sövdələşmələrə bənzəyəcək; bu struktur son onilliklərdə xüsusilə hərbi, kəşfiyyat və iqtisadi sahələrdə gücləndirilib.

Müəllif vurğulayır ki, hakimiyyətin ötürülməsi ehtimal ki, iki mərhələdə formalaşacaq: birinci mərhələdə Sepah komandirləri və hakimiyyətə yaxın qanadlar sistemin bütövlüyünü qorumaq üçün daxili razılaşmaya gələcəklər. Yalnız bu təhlükəsizlik modeli ölkəni sabitləşdirə bilməzsə, ikinci mərhələ – cəmiyyətin dəyişiklik prosesinə ciddi qoşulması üçün zəmin yarana bilər.

Təhlildə həmçinin qeyd olunur ki, SEPAH sərt güc alətləri, iqtisadi şəbəkələr və daxili təhlükəsizlik mexanizmləri sayəsində Xameneidən sonrakı dövrün əsas müəyyənedici aktoru olacaq və rəsmi varislik də bu qurumun dəstəyi olmadan davamlı olmayacaq.

National Interest əlavə edir ki, hakimiyyət piramidasının zirvəsinin dağılması mütləq şəkildə təhlükəsizlik strukturunun sonu demək deyil və həlledici amil elitalar arasındakı parçalanma, ictimai təzyiq və regional-beynəlxalq şərait olacaq.

Sonda vurğulanır ki, İranda “azadlıq” bir şəxsin aradan götürülməsi ilə deyil, təhlükəsizlik strukturunun zəifləməsi və daxili parçalanma baş verdiyi halda mümkün olacaq və ölkənin gələcəyi bu keçidin necə idarə olunmasından asılıdır.