سعودی عربیستان ایله یمن حوثیلری آراسیندا گرگینلیک داوام ائدرکن، پاکستان و چین مسئوللاری تهراندان حوثیلرین سعودی عربیستانا حملهلرینی دایاندیرماق اوچون آددیم آتماسینی ایستهییبلر.
آراز نیوزون بیلدیریگینه گؤره، رویترز راپور وئریب چین اؤزل گؤروشلرده ایران جمهوریتینه باسقی ائدیب و تهراندان اؤز نفوذوندان ایستیفاده ائدهرک حوثیلرین سعودی عربیستانا حملهلرینین قاباغینی آلماسینی ایستهییب.
پاکستان ساوونما باخانی خواجه آصف دا آچیقلاییب اسلامآباد، ریاضین حوثیلرین سون حملهلری ایله باغلی قایغیلارینی تهرانا چاتدیریب.
بو مؤوقع، سعودی عربیستانین حوثیلرین مکهیه ایها (پهپاد) حملهسینی اؤنلهدیگینی آچیقلاماسیندان سونرا اورتایا قویولوب.
عینی زاماندا، تورکیهنین دؤولت خبر آژانسی آنادولو راپور وئریب پاکستان اوردوسونون باش کوماندانی عاصم منیر ده ایراندان حوثیلره باسقی ائدهرک سعودی عربیستانین انرژی آلتیاپیلارینا حملهلرینی دایاندیرماسینی ایستهییب.
