ایران انرژی بیرلیگی (اتحادیهسی) باشقانی هاشم اورعی، قیشین ان سویوق دؤنملرینده ایراندا گاز چاتیشمازلیغینین ۵۰ فاییزه چاتا بیلهجهیی حاققیندا اویاریب. اونون سؤزلرینه گؤره، بو بحران بیرباشا الکتریک شبکهسینی و صنعت ساحهلرینی ده باسقی آلتیندا قویاجاق.
آراز نیوزون فرارودان نقل ائتدیگینه گؤره، اورعی ایراندا الکتریک اورهتیمینین تقریباً ۹۰ فاییزینین گازا باغلی اولدوغونو بیلدیریب و گاز آزلیغی پروبلمینین «گلهجک ۱۰ ایل ایچینده» ده تام حل ائدیلمهیهجهیینی دئییب. او، بو بحرانین بیر یا دا ایکی ایلده حل اولاجاغی حاققیندا ایددیعالارین گرچکچی اولمادیغینی وورغولاییب.
اورعی همچنین انرژی آزلیغینین داوام ائتمهسینین صنعت و ایش یئرلرینی تهدید ائتدیگینی بیلدیریب و انفلاسیونون (تورم) قارشیسینی آلماق اوچون اورهتیم (تولید) واحدلرینه داواملی و گوونلی برق تأمینینین اؤنجهلیک اولمالی اولدوغونو دئییب.
