آزربایجانین تانینمیش اوزانلاریندان و اورمو شهرینین مدنی سیمالاریندان اولان آشیق علی یئکنلی، کئچیردیگی آغیر ترافیک قضاسی نتیجهسینده یارالانیب.
آزربایجان میلّی دیرنیش تشکیلاتینین سؤزچوسو مجید جوادی آراز، ایکس (سابق توئیتر) حسابیندا یاییملادیغی مراجعتده، آشیق علینین جیدی ساغلیق سورونلاری یاشادیغینی بیلدیرهرک، اونون تئز زاماندا ساغلیغینا قاووشماسینی آرزولاییب.
دیرنیش سؤزچوسو، آشیق علی-یه جان ساغلیغی آرزولایاراق یازیب: «انشالله یاخیندا اورمو گؤلونون گؤزل ساحیللری و یئکاناتین باشی اوجا قالا داغی بیر داها آشیق علینین ماهنیلاری ایله شنلهنهجک و مدنی فعاللاریمیزین چابالاری ایله ایشیق اوزو گؤرن شعر دیوانینا یئنی مصراعلار آرتیراجاق.»
مجید جوادی آراز، پایلاشیمینین باشقا بؤلوموندو آرتیریب: «معالاسف اسلام جمهوریتینین یاریتماز استعمارچی سیاستلری سایهسینده حله آزربایجان یوللارینین بیر چوخو قتلگاه اولماغا و قربانلیق آلماغا دوام ائدیر. حؤکومت ایسه وطنداشلارا خدمت ائتمک یئرینه قونشولارا ترور ساچماق و بمب آتماق ایله مشغولدور. »
آرتیرمالیییق، آشیق علی یئکنلی، یئکنلی ائلی و اورمو بؤلگهسینین مدنی حیاتیندا اؤنملی بیر یئره صاحبدیر. اونون ایفا ائتدیگی ماهنیلار و توپلومسال حادیثهلره اولان دویارلیلیغی، اونو بؤلگهده سئویلن شخصیتلردن بیری ائدیب.
