دیرنیش تشکیلاتینین سؤزچوسوندن آنادیلی گونو مئساژی: آزربایجان اؤز موقدّراتینی تعیین ائتمهلیدیر
«آزربایجان میلّی دیرنیش تشکیلاتی»نین سؤزچوسو مجید جوادی (آراز)، ۲ اسفند - دونیا آنادیلی گونو موناسیبتیله یاییملادیغی ویدئو مئساژدا، گونئی آزربایجانداکی سیاسی دوروم، آنادیلی موباریزهسی و ایرانین گلهجک سیاسی موقدّراتی ایله باغلی اؤنهملی آچیقلامالار وئریب.
مجید جوادی اؤز چیخیشیندا آنادیلی گونونو بوتون تۆرک میلتینه تبریک ائدهرک، دیل مسئلهسینین سادهجه بیر کونسئپت دئییل، بلکه بیر میلتین وارلیغی و سیاسی حاقلارینین تمل داشی اولدوغونو وورغولاییب. او، آزربایجان تۆرکجهسینین قاداغان اولونماسینی بیر «اینسانلیق جینیاتی» آدلاندیریب و بو یولدا وئریلن قوربانلاری یوکسک قییمتلندیریب.
دیرنیش تشکیلاتینین سؤزچوسو، ایراندا جریان ائدن سیاسی پروسئسلره توخوناراق بیلدیریب کی، گونئی آزربایجان میلّی حرکتی هم ایران ایسلام رئژیمینه و هم پهلوی ایرتیجاعسینا قارشی ایکی جبههده موباریزه آپاریر.
جوادینین سؤزلرینه گؤره، آزربایجان میلتینین ایستگی سادهجه رژیم دییشیکلیگی دئییل، بلکه اؤز موقدّراتینی تعیین ائتمک و میلی حاقلارینا صاحیب چیخماقدیر.
دیرنیش سؤزچوسو ویدئو مئساژین ان اؤنملی حیصهسینده گونئی آزربایجانین حاضیرکی حساس دؤنمینه ایشاره ائدرک، قئید ائدیب: داغینیق موباریزه کیفایت دئییل؛ میلّی قووهلر بیر آرایا گلمهلی و داها سیخ تشکیلاتلانمالیدیر. گونئی آزربایجان تورک میلّتینین سیاسی شوعورو آرتیق مرکزچی قووهلرین اویونلارینا گلمهیهجک قدر یوکسلیب. ایرانین گلهجک سیاسی خریطهسینده آزربایجانین سؤز صاحبی اولماسی اوچون میلّی دیرنیشین گوجلندیریلمهسی شرطدیر.
جوادی وورغولایب: «بیزیم یولوموز آیدیندیر؛ بیز نه کؤهنهیه قاییدیشی، نه ده مؤوجود ظولمون داوام ائتمهسینی قبول ائدیریک. آزربایجان اؤز گلهجگینی اؤز الی ایله قوراجاق.»
