Cənubi Azərbaycanın beş milli fəalı barədə məhkəmə hökmləri çıxarılıb və onlara təqdim olunub. Hökmlər 1 il həbs, Zabol şəhərində 2 il məcburi yaşayış və elektron xidmətlərdən məhrumetmə cəzalarını nəzərdə tutur.
«Demokratlar»ın məlumatına görə, Sima Əlipur, Nima Radmənəş, Hüseyn İsmayıli, Salar Tahirafşar və Vahid Əbhərinin hər biri 1 il həbs cəzasına məhkum edilib. Onlar həmçinin Sistan və Bəluçistan əyalətinin Zabol şəhərinə 2 il müddətinə sürgün olunacaqlar. Çıxarılan hökmlərə əsasən, bu fəallar həbs cəzalarını da Zabol həbsxanasında çəkməlidirlər.
Zabol həbsxanası ağır şəraiti və son dərəcə məhdud imkanları ilə tanınır. İnsan hüquqları təşkilatlarının hesabatlarına və keçmiş siyasi məhbusların dediklərinə görə, bu həbsxana məhbusların saxlanılması üçün şəraiti yararsız olan həbsxanalardan biri hesab olunur.
Məlumata görə, beş azərbaycanlı fəal həmçinin 2 il müddətinə elektron xidmətlərdən istifadə hüququndan məhrum edilib. Hökmlərdə onlara məxsus mobil telefonlardakı və yaddaş qurğularındakı məlumatların bərpa edilməsi barədə göstəriş də yer alıb. Məlumatları bərpa etmək mümkün olmasa, cihazların məhv edilməsi və SİM-kartlarının telekommunikasiya sistemindən silinməsi nəzərdə tutulub.
Bu hökmlərin icrası fəalları azadlıqdan məhrum edəcək və onları yaşadıqları yerdən, ailələrindən uzaqlaşdıracaq. Bundan əlavə, hökmlər onların əlaqə imkanlarına və gündəlik həyatına ciddi məhdudiyyətlər qoyacaq.
Son illər ağır hökmlər və uzunmüddətli həbs cəzaları ilə Azərbaycan türk milli fəallarına qarşı repressiyalar güclənib. Siyasi müşahidəçilərin fikrincə, bu, İslam Respublikasının təhlükəsizlik qurumlarının narahatlığını göstərir. Bu qurumlar Azərbaycan milli hərəkatının azadlıq və ədalət çağırışlarının xalq arasında yayılmasından narahatdır.
