Türkiyə və ABŞ Nyu-Yorkda yeni nüvə texnologiyalarının araşdırılmasına dair layihə əsaslı razılaşma imzalayıblar. Razılaşmaya əsasən, "Türkiyənin Nüvə Enerjisi Şirkəti" və "ABŞ-ın Ticarət və İnkişaf Agentliyi" kiçik modul reaktorlardan və dördüncü nəsil reaktorlardan Türkiyədə istifadə imkanlarını qiymətləndirəcək.
Bu çərçivədə dörd Amerika şirkətinin kiçik modul reaktorlar sahəsindəki layihələri, habelə dördüncü nəsil reaktorlara aid beş layihə araşdırılacaq. Qiymətləndirmələr texniki xüsusiyyətləri, xərcləri, lisenziyalaşdırma vəziyyətini, təchizat zəncirini, maliyyələşdirmə modellərini, dizayn təhlükəsizliyini, yer seçimini və hüquqi çərçivəni əhatə edəcək.
Ən azı bir il davam edəcək bu texniki tədqiqatın təxminən 2 milyon dollar həcmində qiymətləndirilən xərci Amerika tərəfi tərəfindən qarşılanacaq. Bu razılaşma atom stansiyasının tikintisinə icazə demək deyil, Türkiyədə mümkün nüvə texnologiyalarının seçilməsi üçün texniki hesabatların hazırlanmasına zəmin yaradır.
