İraq Nümayəndələr Məclisinin sədri Məhəmməd əl-Hələbusi İran İslami Şura Məclisinin sədri Məhəmmədbaqir Qalibafa mənalı bir cavab olaraq, üzərində "əl-Xəlic əl-Ərəbi" (Ərəb körfəzi) ifadəsi yazılmış bir xəritə önündə çəkilmiş öz şəklini paylaşıb.
Qalibaf bir gün əvvəl, Bağdada rəsmi səfəri ilə eyni vaxtda, arxa fonunda bölgə xəritəsi olan və üzərində "Fars körfəzi" ifadəsi göstərilən oxşar bir şəkil paylaşmışdı. Əl-Hələbusi cümə axşamı təxminən eyni vizual kompozisiya ilə cavab verib və paylaşımını yalnız "#əl-Xəlic_əl-Ərəbi" heştəqi ilə dərc edib.
Bu şəkil mübadiləsi sosial şəbəkələrdə İran və ərəb istifadəçilərinin geniş reaksiyasına səbəb olub. "Əl-Cəzirə"nin məlumatına görə, əl-Hələbusinin şəkli qısa müddətdə 1,9 milyondan çox baxış toplayıb, Qalibafın paylaşımı isə təxminən 500 min dəfə izlənilib.
Bu polemika iki rəsmi şəxsin Bağdadda keçirdiyi rəsmi görüşdən cəmi bir gün sonra baş verib. Həmin görüşdə ikitərəfli əlaqələr, parlamentlərarası əməkdaşlıq və regional məsələlər müzakirə olunmuşdu. İraq rəsmi olaraq "Ərəb körfəzi" ifadəsindən istifadə edir, İran İslam Respublikası isə "Fars körfəzi" adında israr edir.
