Qəzvin prokuroru İran daxilində və xaricində 96 nəfərin əmlakının dondurulduğunu açıqlayıb və bu şəxslərin “muzdlu” kimi müəyyən edildiyini iddia edib.
ArazNews-un İran dövlət mediasına istinadən verdiyi məlumata görə, 3 nəfərə casusluq, 6 nəfərə isə informasiya fəaliyyəti aparmaq ittihamı ilə ittiham aktı irəli sürülüb.
Məhkəmə orqanları indiyədək ittiham olunanların kimliyi, təqdim edilən sübutlar, məhkəmə prosesi, vəkilə çıxış imkanları və ya açıq məhkəmə barədə heç bir detal paylaşmayıb.
İnsan haqları qurumları son illərdə İran rejiminin müxaliflərə, vətəndaş fəallarına və tənqidçilərə qarşı təhlükəsizlik ittihamlarından geniş istifadə etdiyini dəfələrlə tənqid edib və şəffaf məhkəmə olmadan bu cür qərarların əsas hüquqların pozulmasına yol aça biləcəyi barədə xəbərdarlıq edib.
