İranda xammal çatışmazlığı və istehsal problemləri səbəbindən iki sənaye müəssisəsində yüzlərlə işçinin işdən çıxarıldığı bildirilir.

ArazNews-un İlna agentliyinə istinadən verdiyi məlumata görə, Lorestan vilayətində yerləşən “Boruçerd Tekstil” fabrikində azı 700 işçi ixtisar edilib. Məlumata əsasən, cari ilin fərvərdin ayından etibarən müqavilə müddəti başa çatan işçilərin böyük hissəsi işsiz qalıb. 5 ildən 20 ilə qədər iş təcrübəsi olan bu işçilərin ixtisarına səbəb kimi xammal çatışmazlığı göstərilir. Hazırda müəssisədə yalnız mühafizə və xidmət sahələrində məhdud sayda işçi fəaliyyət göstərir və digər işçilər işsizlik sığortası üçün təqdim olunub.

Mənbə həmçinin işçilərin ödənilməmiş haqlarına diqqət çəkərək bildirib ki, həm işdən çıxarılanlar, həm də çalışanlar ən azı bir aylıq maaş və bayram mükafatlarını ala bilməyiblər. Rəsmilərin fabrikin fəaliyyətinin bərpası ilə bağlı vədlərinə baxmayaraq, xammal çatışmazlığı əsas problem olaraq qalır.

Eyni zamanda, Rəşt şəhərində yerləşən Lakan sənaye zonasındakı “Pink” şirkətində də təxminən 500 işçinin işsiz qaldığı bildirilir. Müvəqqəti müqavilə ilə çalışan bu işçilər müqavilə müddəti bitdikdən sonra xammal çatışmazlığı və elektrik enerjisindəki problemlər səbəbilə işdən uzaqlaşdırılıb.

Yerli mənbələrin bildirdiyinə görə, bu işçilərin orta iş stajı 7 ildən 20 ilə qədərdir və aralarında təqaüdə yaxın olan təxminən 30 nəfər də var ki, işsizlik sığortası onların gələcək pensiya vəziyyətinə mənfi təsir göstərə bilər.

Bu hadisələr müharibə sonrası iqtisadi böhranın dərinləşdiyi, işsizliyin artdığı və istehsal müəssisələrinin xammal, enerji və maliyyə problemləri ilə üzləşdiyi bir dövrdə baş verir.