Rusiya və Çinin xarici işlər nazirləri regional məsələlər və ikitərəfli əməkdaşlıq barədə müzakirələr aparır.

Araz News-un Reuters-ə istinadən verdiyi məlumata görə, Rusiyanın xarici işlər naziri Sergey Lavrov çərşənbə axşamı Çin rəsmiləri ilə danışıqlar aparmaq üçün Pekinə gəlib.

Rusiya Xarici İşlər Nazirliyinin açıqlamasına əsasən, Lavrovun çinli həmkarı Vanq Yi ilə Ukrayna müharibəsi və Yaxın Şərqdəki vəziyyət, xüsusilə İranla bağlı son proseslər daxil olmaqla müxtəlif mövzular ətrafında fikir mübadiləsi aparacağı gözlənilir.

Görüşdə həmçinin BMT, BRİKS, Şanxay Əməkdaşlıq Təşkilatı, G20 və Asiya-Sakit Okean İqtisadi Əməkdaşlıq Forumu çərçivəsində koordinasiya və ikitərəfli əməkdaşlıq məsələləri müzakirə olunacaq.

Rusiya və Çin daha əvvəl 2022-ci ildə “məhdudiyyətsiz tərəfdaşlıq” elan etmişdi və bu münasibətlər son illərdə müxtəlif sahələrdə genişlənib.