Məhkəmə hakimiyyətinin sözçüsü bəzi 18 yaşdan kiçik etirazçıların hələ də saxlanıldığını təsdiqləyib və Şirazda ailələrdən girov pulu alındığı iddialarını rədd edib.

Araz News-un məlumatına görə, məhkəmə hakimiyyətinin sözçüsü Əsgər Cahangir İLNA agentliyinə açıqlamasında bildirib ki, 18 yaşdan aşağı saxlanılanların böyük hissəsi “ilkin prosedurlar” tamamlandıqdan sonra azad edilib. Onun sözlərinə görə, “az sayda” yeniyetmə isə guya “cinayət xarakterli əməllər” törətdiyi üçün hələ də həbsdə saxlanılır və onların işi üzrə araşdırma davam edir.

Cahangir Şirazlı bir vəkilin müvəqqəti həbs qətimkan tədbirinin dəyişdirilməsinin 100–300 milyon tümən məbləğində vəsaitin bələdiyyə hesabına köçürülməsi ilə şərtləndirildiyi barədə iddiasına da münasibət bildirib. O, bu iddianı “yalan” adlandıraraq belə ittihamları səsləndirən şəxslərin bunu sübut etməli olduqlarını deyib.

Buna baxmayaraq, təhlükəsizlik xarakterli işlər üzrə 18 yaşdan aşağı şəxslərin saxlanılmasının davam etməsi uşaq hüquqlarının qorunması ilə bağlı ciddi suallar doğurur. Beynəlxalq insan hüquqları standartlarına əsasən, uşaqların həbs edilməsi son vasitə və mümkün olan ən qısa müddət üçün tətbiq olunmalıdır. Lakin saxlanılma şəraiti və istintaq prosesinin detalları barədə hələ də şəffaf məlumat təqdim edilməyib.