İsrailin Baş naziri ölkəsinin Donald Trampın "Sülh Heyəti" (Board of Peace) adlanan təşəbbüsünə qoşulduğunu elan edib. Bu mexanizm Qəzzanın yenidən qurulmasına və müvəqqəti idarə olunmasına nəzarət etmək üçün nəzərdə tutulub.

Araz News-un Röyters agentliyinə istinadən verdiyi məlumata görə, Benyamin Netanyahu Vaşinqton səfəri zamanı ABŞ Prezidenti və dövlət katibi ilə görüşdən sonra İsrailin bu heyətə üzvlük sənədini imzalayıb. Bu strukturun ilk iclasının fevralın 19-da Vaşinqtonda keçirilməsi və Qəzzanın bərpası məsələsinin müzakirə edilməsi planlaşdırılır.

Trampın Qəzzanın gələcəyi ilə bağlı planı ilə əlaqəli olan bu heyət bəzi hüquqşünaslar və beynəlxalq ekspertlər tərəfindən tənqidlə qarşılanıb. Tənqidçilər belə bir strukturun BMT-nin mövqeyini zəiflədə biləcəyini və fələstinli nümayəndənin olmaması səbəbindən legitimlik problemi ilə üzləşəcəyini bildirirlər.

Eyni zamanda, Qəzzada kövrək atəşkəs rejimi dəfələrlə pozulub və hesabatlar hər iki tərəfdə insan tələfatının davam etdiyini göstərir. Təklif olunan planın növbəti mərhələlərinə Həmasın tərksilah edilməsi və beynəlxalq qüvvələrin yerləşdirilməsi daxildir; bu mövzular isə hələ də ciddi ixtilaf mənbəyi olaraq qalmaqdadır.