Türkiyənin xarici işlər naziri Hakan Fidan bildirib ki, Suriyadakı bütün silahlı qruplar və qeyri-rəsmi strukturlar mərkəzi, qanuni və milli bir strukturun çətiri altında birləşməlidir.
Türkiyə mediasının məlumatına görə, Fidan Ankarada Suriyanın xarici işlər naziri Əsəd Həsən əş-Şeybani ilə görüşdən sonra deyib ki, vahid və mərkəzi hakimiyyətə malik Suriyanın formalaşması bu ölkənin və regionun təhlükəsizliyinin təmin olunması üçün zəruridir. Onun bu sözləri, görünür, Suriya Demokratik Qüvvələrinin və digər silahlı qrupların Dəməşq hökumətinin strukturuna inteqrasiyası prosesinə işarə edir.
Türkiyənin xarici işlər naziri həmçinin Türkiyə, Suriya, İordaniya və Səudiyyə Ərəbistanı arasında avtomobil və dəmir yolu əlaqə dəhlizinin yaradılması istiqamətində fəaliyyətlərin başladığını bəyan edib və bu layihəni regionda ticarətin, nəqliyyatın və əlaqələrin inkişafı üçün strateji layihə kimi təsvir edib.
Fidan əlavə edib ki, Dəməşqdə bir türk məktəbinin açılması üçün lisenziya prosedurları başa çatdırılıb və Ankara onu yeni tədris ilində açmağı planlaşdırır. Onun sözlərinə görə, Türkiyə ilə Suriya arasında birgə universitet yaradılması ilə bağlı danışıqlar da sürətlənib.
