Araz News-in məlumatına görə, New York Times ABŞ kəşfiyyat qiymətləndirmələrinə istinadən yazıb ki, İran rejimi son müharibədən sonra raket infrastrukturunun böyük hissəsini yenidən işə salıb.

Məlumata əsasən, İran Hörmüz boğazı boyunca yerləşən 33 yeraltı raket bazasından ən azı 30-nu yenidən əməliyyat vəziyyətinə qaytarıb.

Kəşfiyyat mənbələri həmçinin iddia ediblər ki, İran rejimi raket anbarları və buraxılış sistemlərinin təxminən 90 faizini, raket arsenalı və mobil sistemlərinin isə təxminən 70 faizini bərpa edib.

New York Times yazır ki, bu vəziyyət yenidən ABŞ hərbi gəmiləri və Hörmüz boğazından keçən neft tankerləri üçün ciddi təhlükə yarada bilər.

Bu hesabat həmçinin vurğulayır ki, yeni məlumatlar Donald Tramp administrasiyasının İran rejiminin hərbi gücünün ciddi şəkildə zəiflədiyi ilə bağlı iddiaları ilə tam uyğun gəlmir.