İranla müharibədə çıxılmaz vəziyyət davam etdiyi bir vaxtda, Donald Tramp çərşənbə axşamı Ağ Evdə ABŞ-ın neft və qaz şirkətlərinin yüksək səviyyəli rəhbərləri ilə görüşərək bu böhranın enerji nəticələrini müzakirə edib.

Chevron şirkətinin baş direktoru Mayk Vörs bu iclasda iştirak edənlər arasında olub. Həmçinin Ağ Evin aparat rəhbəri Suzi Vaylz, maliyyə naziri Skott Bessent və xüsusi nümayəndələr Stiv Vitkof və Cared Kuşner də bu görüşdə iştirak ediblər.

Yaxın Şərqdə neft tədarükünün pozulması qlobal qiymətlərin kəskin artmasına səbəb olub və dünya üzrə dəniz yolu ilə daşınan neftin təxminən dörddə birinin keçdiyi Hörmüz boğazının faktiki bağlanması enerji bazarlarında şok yaradıb. ABŞ daxilində isə benzinin orta qiyməti hər qallon üçün 4.18 dollara çatıb ki, bu da 2022-ci ildən bəri ən yüksək səviyyədir. Bu şəraitdə Ağ Ev “Jones Act”dan müvəqqəti azadolma kimi tədbirləri nəzərdən keçirir, eyni zamanda Bəsrə körfəzi bölgəsindən tədarükün azalması ABŞ enerji ixracının artması üçün yeni imkan yaradıb.

Jones Act ABŞ-ın 1920-ci ildən qüvvədə olan köhnə dəniz qanunudur və yalnız ABŞ-da istehsal edilmiş, ABŞ mülkiyyətində olan və amerikalı heyət tərəfindən idarə olunan gəmilərə ölkə daxilində limanlar arasında yük daşınmasına icazə verir. Mövcud şəraitdə bu qanunun tətbiqi ABŞ daxilində neft daşınmasının xərclərini artırır. Buna görə də Tramp benzinin bahalaşması fonunda bu qanunu müvəqqəti dayandırıb ki, daha ucuz xarici gəmilər də daxili neft daşınmasında iştirak edə bilsin.