ABŞ ordusu Hörmüz boğazını yenidən açmaq və İranın bu strateji marşrut üzərində nəzarətini azaltmaq üçün pilotsuz aparat və dəniz robotlarından istifadə edərək ehtimal olunan minaların aşkarlanması və təmizlənməsi üzərində çalışır.

ArazNews-un məlumatına görə, “Wall Street Journal”a istinadən, ABŞ rəsmiləri bildirib ki, əməliyyat həm insanlı, həm də pilotsuz sistemlərin birgə istifadəsi ilə həyata keçirilir. Bu robotlar sonar vasitəsilə dənizin dibini skan edərək minaları müəyyən edir və hərbçilərin həyatını riskə atmadan mina təmizləmə əməliyyatlarında istifadə olunur.

İran rejimi bir daha Hörmüz boğazını bağladı və ən azı iki gəmiyə atəş açdı. Tehran həmçinin bəyan edib ki, keçmək istəyən gəmilər İran sahillərinə yaxın yeni marşrutlardan istifadə etməli və rüsum ödəməlidir.

Hərbi analitiklər bildirir ki, minaların təmizlənməsi boğazın əsas marşrutu üzrə gəmi keçidinin bərpası üçün əsas şərtdir. Onların sözlərinə görə, minalar aşkar edildikdən sonra növbəti mərhələ uzaqdan partlatma yolu ilə onların zərərsizləşdirilməsidir.