İranda mövcud hakimiyyət son təxminən 47 il ərzində öz siyasətləri ilə İranı və onun xalqlarını davamlı gərginlik və qarşıdurmalara yönəltmişdir. “İnqilabın ixracı” siyasəti və əsassız, düşmən xarakterli şüarlar regional böhranlara zəmin yaratmış və bunun əsas yükünü İran xalqları daşımışdır.

Bu gün baş verənlər xalqların müharibəsi deyil; əksinə, dövlətlər və hakimiyyətlər arasında güc və regional hegemonluq uğrunda mübarizədir. Bir tərəfdə İsrail, Amerika Birləşmiş Ştatları və onların regional müttəfiqləri, digər tərəfdə isə İranın qeyri-legitim hakimiyyəti dayanır. Bu müharibə nə bizim xalqımızın, nə də İranın digər xalqlarının müharibəsidir.

Bu çərçivədə vurğulanır ki, Güney Azərbaycanın və ümumilikdə İranın qeyri-hərbi infrastrukturunun hər hansı şəkildə dağıdılması heç bir tərəf tərəfindən qəbul edilə bilməz. Elektrik stansiyaları, neft və qaz obyektləri, məktəblər, sənaye mərkəzləri, körpülər və digər həyati və qeyri-hərbi infrastrukturların hərbi əməliyyatlar üçün hədəf və ya örtük kimi istifadəsi qəbuledilməzdir və beynəlxalq hüquqa ziddir; buna görə də bu hallar dərhal və qəti şəkildə müharibə mövzularından çıxarılmalıdır.

İran hakimiyyəti xaricdə gərginlik yaratmaqla yanaşı, ölkə daxilində də repressiv siyasətlərini nəzərəçarpacaq dərəcədə artırmışdır. Bu siyasətlərin əsas qurbanlarından biri Güney Azərbaycanın milli-siyasi fəallarıdır. Bu fəallar yalnız öz xalqlarının mülki hüquqlarını – dil, kimlik, mədəniyyət və davamlı iqtisadi inkişaf hüquqlarını – dinc şəkildə müdafiə etdikləri üçün fəaliyyət göstərmişlər. Buna baxmayaraq, yüzlərlə insan əsassız ittihamlarla həbs edilmiş, işgəncəyə məruz qalmış, mühakimə olunmuş və həyati təhlükə ilə üz-üzə qalmışdır. Bu kontekstdə biz siyasi məhbusların vəziyyəti və həyatı ilə bağlı dərin narahatlığımızı ifadə edir və xüsusilə hazırkı gərgin şəraitdə onların sağlamlığı və həyatı ilə bağlı məsuliyyətin birbaşa İran hakimiyyətinin üzərinə düşdüyünü vurğulayırıq.

Bu fəallardan aşağıdakı şəxsləri qeyd etmək olar:

Mehrəli Bəygolu, Əbdüləziz Əzimi Qədim, Əli Babayi, Mürtəza Pərvin, Vədud Əsədi, Tahir Nəqəvi, Abbas Lisani, Əyyub Şiri, Araz Aman, Baqir Hacı-zadə, Ayaz Seyf-xah, İbrahim Asimani, Məhəmmədrza Fəqihi, Salar Tahirəfşar, Mahmud Ocaqlo, Kərəm Mərdanə, Əli Xeyircu, Fatimə Atəşi Xiyavi, Yusif Kari, Hüseyn Amani Nadarli, Əlirza Fərşi, Yunus Mərami, Əbülfəzl Rəncəbri və digər həbsdə olan fəallar.

Güney Azərbaycan Təşkilatlarının Əməkdaşlıq Şurası bütün siyasi və mülki fəallara, xüsusilə Güney Azərbaycanın milli-siyasi fəallarına tam dəstəyini ifadə edir və bütün siyasi məhbusların dərhal və qeyd-şərtsiz azad edilməsini tələb edir. Bir daha vurğulanır ki, bu şəxslər tamamilə günahsızdır və yalnız öz xalqlarının tapdanmış hüquqlarını müdafiə etdiklərinə görə həbs olunmuşlar. Güney Azərbaycan Təşkilatlarının Əməkdaşlıq Şurası bu ədalətsiz və qeyri-insani hərəkətləri qətiyyətlə pisləyir.

Bu çərçivədə, Güney Azərbaycan Təşkilatlarının Əməkdaşlıq Şurası BMT-nin İranda insan hüquqları üzrə xüsusi məruzəçisi xanım doktor May Sato, İranda etirazçıların repressiyası ilə bağlı BMT-nin faktaraşdırıcı komitəsinin hörmətli üzvləri xanımlar Sara Hüseyn, Şahin Sərdar Əli və Viviana Krstiçeviç, həmçinin BMT-nin İnsan Hüquqları üzrə Ali Komissarı cənab Volker Türk və digər BMT insan hüquqları mexanizmlərindən xahiş edir ki, öz rəsmi yazışmalarında və hesabatlarında azərbaycanlı siyasi və mülki məhbusların hüquqlarına xüsusi diqqət yetirsinlər və İran hakimiyyətinin həbsində olan bütün siyasi və mülki məhbusların qeyd-şərtsiz azad edilməsini tələb etsinlər.

Biz qəhrəman Azərbaycan xalqının böyük gücünə sarsılmaz inanırıq və inanırıq ki, bu zindanların qapılarının qırılacağı gün bu böyük millətin iradəsi və möhkəm əzmi sayəsində çox yaxındır. Gələcək bizimdir!

Azadlıq, ədalət, milli hökumət

Güney Azərbaycan Təşkilatlarının Əməkdaşlıq Şurası (GATƏŞ)