Türkiyə prezidenti Rəcəb Tayyib Erdoğan regionda baş verən son hadisələrə toxunaraq bildirib ki, Ankara zəruri olarsa müdaxilə etməyə hazırdır və ölkə sərhədlərinin və hava məkanının təhlükəsizliyi heç vaxt təsadüfə buraxılmayacaq.

Erdoğan vurğulayıb: “Vətənimiz və bayrağımız təhdid edildiyi, müstəqilliyimiz və gələcəyimiz təhlükə altına düşdüyü hər dəfə tarix boyu hansı millət olduğumuzu dəfələrlə göstərmişik.” O əlavə edib ki, Türkiyə NATO müttəfiqləri ilə yaxın koordinasiya və məsləhətləşmələr çərçivəsində bütün zəruri tədbirləri görəcək və “lazım gələrsə dərhal müdaxilə edəcək”.

Türkiyə prezidenti regionun çətin günlərdən keçdiyini bildirərək çəkindiriciliyin gücləndirilməsinin vacibliyini vurğulayıb və deyib: “Bir millət olaraq əbədi vətənimiz olan bu torpaqlarda sülh və sabitlik içində yaşamaq istəyiriksə, çəkindiriciliyimizi davamlı şəkildə artırmalıyıq.”

O həmçinin qeyd edib ki, Türkiyənin ölkə və millət təhlükəsizliyini təmin etmək üçün həm iradəsi, həm də imkanları ən yüksək səviyyədədir və aidiyyəti qurumlar regiondakı hadisələri diqqətlə izləyir.