Türkiyənin "Hürriyyət" qəzeti Ərdoğan və Tramp arasındakı telefon danışığından sonra Ankara, Vaşinqton və Tehran nümayəndələrinin iştirakı ilə Ankarada üçtərəfli görüşün keçirilməsi ehtimalı barədə məlumat yayıb.

Araz News-un məlumatına görə, "Hürriyyət" qəzeti bugünkü sayının manşetində Donald Trampın İran, ABŞ və Türkiyənin iştirakı ilə Ankarada keçiriləcək üçtərəfli görüşə razılıq verdiyini yazıb. Hesabata əsasən, Rəcəb Tayyib Ərdoğan gərginliyin daha da artmasının qarşısını almaq məqsədilə belə bir görüşün keçirilməsi təklifini irəli sürüb və ev sahibliyinə hazır olduğunu bildirib.

"Hürriyyət" həmçinin qeyd edib ki, təklifə əsasən, bu görüş hər üç tərəfin hərbi və təhlükəsizlik ekspertlərinin iştirakı ilə baş tuta bilər. Bunun ardınca, yaxın günlərdə İranın xarici işlər naziri Abbas İraqçının Ankaraya səfər edəcəyi ehtimalı da gündəmə gəlib; lakin görüşün detalları və dəqiq vaxtı hələlik yekunlaşmayıb.