پوتین آزربایجاندا
۷ ایل آرا‌دان سونرا روسیا پرزیدنتی ولا‌دیمیر پوتین آذربایجانا گئتدی.
پوتین، اؤزو ایله باکییا ٦ دا باخان گتیردی.
آزربایجان پرزیدنتی ایلهام علی‌یئو، روس قونومداشینی زاگولبا ساراییندا مراسیمله قارشیلادی. پوتینه باکی سفرری سیراسیندا ساواش گمی‌لری‌نین ائش‌لیک ائتمه‌سی ده دقت‌لردن قاچمادی.
باش باشا و هیات‌لر آراسی گئچیریلن گؤروشمه‌لرده بیر چوخ مؤوضوع دانیشیلدی، امکداش‌لیق پروتوکول‌لاری ایمضالاندی. اؤنجه‌لیک‌لی اولا‌راق انرژی سئکتوروندا ائدیله‌بیله‌جکلر مذاکیره ائدیلدی. آذربایجان دؤولت نفت شیرکتی سوکار ایله روس دؤولت نفت شیرکتی روزنفت آراسیندا طبیعی گاز چیخاریمی و داشینماسی ایله بیرلیکده نفتین نقلینی اؤن گؤرن امکداش‌لیق آنلاشماسی ایمضالاندی.
حربی ساحه‌ده ائدیلن امکداش‌لیق دا بیر باشقا اؤنم‌لی گوندم ماده‌سی اولدو. ایلهام علی‌یئو، آذربایجانلا روسیا آراسیندا حربی ساحه‌ده ٤ میلیارد دو‌لارلیق تیجارت حجمی اولدوغونا وورغو ائتدی و امکداشلیغین آرتا‌راق داوام ائدجیینی سؤیله‌دی. آذربایجان گئچدیگیمیز گون‌لرده روسیا ایله ۱ ویرگول ٦ میلیارد دو‌لار مبلغینده سلاح آلیشی آنلاشماسی ایمضالامیشدی.
ایکی اؤلکه اولاغان‌اوستو حال‌لار باخان‌لاری آراسیندا دا بیر پروتوکول ایمضالاندی. بو پروتوکول‌لارلا بیرلیکده ۲۰۱۳ – ۲۰۱٥ ایللری آراسیندا مولکی مدافعه، طبیعی فلاکت‌لر، اینسانی کؤمک مؤوضوعلاریندا کووردیناسیون تامین ائدیلمیش اولا‌جاق.
خاریجی ایشلر باخانلاری‌نین گوندمینده ایسه، خزرین ایستاتوسو و اینسان حاق‌لاری‌نین قورونماسی یولوندا ائدیله‌بیله‌جک امکداش‌لیق واردی.
آذربایجان جبهه‌سی‌نین بلکه ده ان چوخ ماراقلاندیغی مؤوضوع پوتی‌نین قاراباغ قونوسون‌داکی آچیقلاماسی ایدی. آنجاق وئریلن آچیقلاما اؤنجه‌کی‌لر‌دن چوخ دا فرق‌لی اولمادی. پروبلئمین باریشجیل یؤندم‌لر، سیاسی یول‌لارلا حل ائدیلمه‌سینین گرک‌لی‌لیگی وورغولاندی.
نقلیات باخانلاری‌نین گوندمینده ایسه روسیا و آذربایجان سرحدینه اینشا ائدیله‌جک و ایکی اؤلکه آراسین‌داکی اولاشیمین آسانلاشماسینی تامین ائده‌جک سامور کؤرپوسونون اینشاسی واردی.
تی ار تی
