باتی آزربایجان گنجلر بیرلیگی‌نین بویوک بی رسول‌اوغلو ایله سویلشی‌سی
دیرلی اوستاد جناب رسول‌اوغلو بیزه واقتینیزی وئرمکدن تشکور ائده‌رک خواهیش ائدیریک بویورون سیزجه کورد تئروریزمی بو گون میلتیمیزی هانگی یوللارلا تهدید ائدیر و بو تهدیدلر نقده‌ر گرچکدیر؟
کورد تئروریزمی و اونون یانیندا بعضی تجاووزکار سییاستلرین تاریخینه باخدیغیمیزدا اونون چئشیتلی سبب، یول و یؤنتملرینی گؤرمک مومکوندور. شوبهه یوخدور کی، آپاردیقلاری سییاست، توتدوقلاری یول، زامان و مکان شراییطی‌نه گؤره دئییشمکده‌دیر. بویوک رسول اوغلوبو عئینی زامان‌دا تهرانداکی حاکیمییتینده سیاستلری ایله دئییشه بیلمکده‌دیر. اونا گؤره‌ده بونلار تاریخی تحریفدن توتموش، شیعه- سوننی مسئله‌سین، ایرقچی دوشونجه‌دن توتموش کومینیزم تئوریسینه پناه گتیره‌رک اؤز ایستکلرینی قالیبلاشدیرمیشلار. کوتلوی اینفورماسیون واسیطه‌لرینده‌کی تجاووزکار تبلیقات گؤستریر کی، بوگونکو دونیا و بؤلگه‌ده‌کی شراییطدن‌ده یئتری قدر فایدالانیرلار. ایستر آمئریکادان قایناقلانان اورتا دوغو پروژه‌سی، ایستر تورکییه‌نین توتومو، ایستر ایراق‌دا باش وئرنلر، ایسترسه‌ده ایران‌دا حاکیم اولان دوشونجه بونلارین مئیدانلارینی گنیشلندیرمیش، گئچمیشه نیسبتن داها‌دا شیرنیشدیرمیشدیر. شمالی ایراق‌داکی کورد بؤلگه‌سینده باش وئرنلر آچیق و آیدینجا گؤستریر کی بو تهدید بیزیده گؤزله‌ییر. آنجاق بودا آیدیندیر کی، گونئی آزربایجان‌داکی بوگونکو دوروم گئچمیشله موقاییسه ائدیلمییه‌جک قدر دئییشمیشدیر. آزربایجان میللی حرکتی گوجلو بیر شکیلده ایره‌لیله‌ییر و اؤزللیکله گنجلریمیز حادیثه‌لری قاباقلییاراق مودافیعه سیستملرینی حاضیرلاییر. طبعیدیر کی، اونلار بیزیم بو گوجلو پوتانسییه‌لیمیزی حسبالارینا قاتاراق حرکت ائدیرلر و ائده‌جکلر. بونودا آرتیرمالییام کی، شیعه-سوننی مسئله‌سینده اونلار بوگون داعش و یا ایشید دئییلن قروپون توتدوغو یول ایله‌ده بیر حرکتلر ائتمه‌یه چالیشا بیلرلر. آما منیم فیکریمجه هر هانسی بیر بهانه واسیطه‌سیندن ایستیفاده ائده‌رک یارادا بیلجکلری قارقاشا، دینی مسئله‌سیندن زییاده میللی مسئله و دوشدوکلری ایرقچی تفککوردن کؤکلنمکده‌دیر. اونا گؤره‌ده هم آزربایجان‌لی شیعه سویداشلاریمیز همده بیزیم باتی آزربایجان‌دا یاشایان دیرلی سوننی تورک قارداشلاریمیز آییق و ساییق اولمالی و پارچالا حاکیم اول سییستلرین تبلیقاتینا اینانمامالیدیر.
بودا آیدیندیر کی بوگونکو دوروم‌دا اونلار ایقتیصادی گوجلرینی ایشلده‌رک باتی آزربایجان شهرلرینده توپراقلاری و ایقتیصادی قوروملاری یییلنه‌رک جمعییتین ترکیبینی دئییشمه‌یه چالیشیرلار. بیزیمکیلر اؤز شخصی معنافعی دئییل بوتون میلتین معنافعینی دوشونه‌رک بونو اؤنله‌ملدیرلر و راحاتجا دا اونلارین بو یؤنتمینی اؤنلویه بیلرلر.
بویوک بی ایندی تئرور ۳۰ ایلدن چوخدور کی قاپیمیزدا و چوخ تاسوف‌له ایراقین سون آیلاردا اولان واهیم دورومو بیزیم اوستوموزه‌ده قارا پنجه‌سین سالا بیلر لوطفن بویورون تئروریزمه قارشی نه ائتمه‌لیک؟
ایلک باشدا اؤز تبلیقاتیمیزی آرتیرمالی، اؤزللیکله باتی آزربایجان حاقیندا تاریخی سندلرین یانیندا، اوراداکی گرچکلری آنلاداراق میللی وارلیغیمیزی گوجلندیرمه‌لیگیک. بونون یانیندا، بؤلگه‌نین قربینده ایراق و تورکیه سرحدلرینده یاشایان کوردلری اویاندیرمالی و بو تئروریست قروپلارین الینده قولچاق اولماقلارینین اونلارین باشینا بؤیوک بیر بلا آچاجاغینی آنلاتمالیییق. عئینی زامان‌دا بیز اؤزموزه ایسته‌دیگیمیز حاقلاری بوتون میلتلره‌ده ایسته‌دیگیمیزی و آزربایجان‌دا یاشایان اینسانلارین بوتون حهاقلارینین قوروناجاغینی بیان ائتمه‌لیگیک. فیکریمجه بوگونکو دوروم‌دا حقیقتنده تئروریست باشچیلارینا اینانان او بؤلگه‌ده‌کی ساده اینسانلارین باشینا گله‌جک بلالر آغیر اولاجاقدیر. چونکی، بوگون آرتیق میلت تهرن‌داکی‌لارین وئره‌جگی قرارا دئییل، اؤز ایراده‌سی ایله و گوجو ایله هوجوملارا و تالانلارا جاواب وئره‌جکدیر. ائله ایسلام اینقیلابی زامانیندا گؤستردیگی قرارلیلیق بو جاوابین کیچیک بیر نومونه‌سیدیر. امینم‌کی، گله‌جکده‌کی حادیثه‌لر چوخ داها فرقلی چوخ داها سرت اولاجاقدیر.
آما بیر حقیقتیده اونودمامالیییق، دونیادا بوگونه قدر اولدوغو کیمی بوندان سونرادا “گوجلو حاقلیدیر” تئوریسی ایشله‌ییب و ایشلیه‌جک. عئینی زامان‌دا بودا آیدیندیر کی، باریش اوچون گوجلو اولمالیسان کی، هوجوما معروض قالیب ساواشماغا مجبور اولمویاسان. باتی آزربایجان‌دا بو حاقدا باش وئرن حادیثه‌لر آچیقجا گؤستریرکی اولایلارین گئدیشاتی تمامن سیلاحلی گوجوموزون دورومون‌دان آسیلی اولموشدور. ۱۲۹۷-جی ایل آخیر چرشنبه‌یه ایکی گون قالمیش آمئریکانین اورموداکی کونسولو مر. سهئدین سیلاحسیزلاشدیرما سییاستینه اویان آزربایجان تورکلری سیلاحلارینی تحویل وئرمه‌سه‌یدیلر، ایکی گون سونرا آخیر چرشنبه گونو علی دهقانین گؤردویو و یازدیغینا گؤره اورمودا بیر گونده ۱۰۰۰۰ تورکون جانینا قیییلمازدی. کاظیم خانین سیلاحلی قروبو اولماسایدی، قوشچو-قولونجو اطرافینداکی تورک کندلرینین باشینا همین گه‌لردی کی، داغ اسکربادیندا گلدی. سیمیتقونون آتلیلاری اونلاریندا باشینی، بدن قیراغینداکی حئسارلارین گؤزتچی باجالاریندان چیخاریب ایکی بویون کل قوشوب باشلارینی بدنلریندن آییراردیلار. همین زامان آندرانیک ۳۰۰۰ قوشونلا “خوی” شهرینه هوجوم ائدنده خویلولار سیلاحلانیب شهرین قالالاریندا جانانه موقاویمت گؤستریب دوشمنی گئری پوسکوردمسیدی خویلولارین باشینا گلبیله‌جک بلا اورمولولارین باشینا گلندن آز اولمویاجاقدی. بونا چوخلو میثاللار گتیرمک اولسادا سؤزو اوزاندیرماماق اوچون ایسلام اینقیلابی زامانی سولدوزا- اورمویا- سالمسا-قوشاچایا- نازلو و باشقا یئرلره اولان هوجوملارداکی سیلاحلی موقاویمیتین نتیجه‌لرینی خاطیرلاماغیمیز دوزگون نتیجه چیخارتماغیمیز اوچون یئترلیدی فیکریمجه. البتده میلتیمیز بو حادیثه لری آغیزدان آغیزا اؤیرنه‌رک بو تاریخی تجروبه‌لردن فایدالانیب و فایدالانمالیدیر. اونون اوچوندور کی، اورمو و اورمو اطرافی تورک کندلرینده دواملی اؤزونو مودافیعه اوچون یئتری قدر سیلاح سورسات اولموشدور و امینم‌کی، بوگونده مؤوجوتدور. آنجاق، بوگونکو شراییط بیزه امر ائدیر کی، گئچمیشده‌کی ندن داها گوجلو داها حاضیرلیقلی اولمالیییاق.
سون سورو اولاراق بویورون میللی حرکت اولاراق تئروریزم قارشیسیندا نه حددیده باشاریلی اولموشوق و بونداسن سونرا نه ائتمه‌میز لازیمدیر؟
آزربایجان میللی حرکاتی بوگونکو فورماسیندا، یعنی تورکلوک محوری اطرافیندا دولانان آزربایجان‌چیلیق دوشونجه‌سی ایله گؤردویو چوخ ایشلر اولوب و البتده گؤرولمه‌سی گرکن چوخلو فعالییتلرده لازیمدیر. باتی آزربایجان حاقیندا میللی حرکتیمیزن اویانیقلیغی هر کسه معلومدور. خاریجده‌کی‌لرین باتی آزربایجان و کورد تئروریزمی ایله باغلی چئشیتلی واسیطه‌لرله موناسیبتلری اینکار ائدیلمزدیر. کوتلوی اینفورماسیون واسیطه‌لریمیزده باتی آزربایجان‌لا باغلی گئنیش معلومات، تاریخی سند، خریطه، بیلگی و باشقا معلوماتلاریندا یاییلدیغی معلومدور. سون زامانلار “گووگل” یایدیغی آزربایجان توپراقلاری خریطه‌سینده تاریخی توپراقلاریمیز اولدوغو کیمی گؤستریلمه‌سه‌ده باتی آزربایجان‌لا باغلی گؤرونتولر گؤستریر کی، بین‌الخالق قوروم‌لاردا دا باشاریلاریمیز اولموشدور. بودا آیدیندیر کی، تئروریزمین گوجلو تبلیقاتی قارشیسیندا بونلار یئترلی دئییل، داها چوخ فعالییت گرکمکده‌دیر. داخیلده‌کی میللی فعاللاریمیزیندا بو باره‌ده‌کی اویانیقلیغی کیمسه‌یه سیر دئییل. سولدوز حادیثه‌لری ایله باغلی گئچیریلن ایل دؤنوملرینده آزربایجانین بوتون شهرلریندن گلیب اورادا ایشتیراک ائتمه‌سی اینسانیمیزین بو حاقداکی حساسییتینین بیر نمونه‌سی‌دیر. اورمو بیلی‌یوردونداکی سویداشلاریمیز، تئروریست قروپلارینین دایاناقلارینی ایفشا ائدیب اونلاری، دؤللنمه‌دن قیسیرلاشدیراراق قارشیلارینی آلدیقلارینین دفعه‌لرله شاهیدی اولموشوق. بونلارین یانیندا ” باتی آزربایجان مودافیعه کومیته‌سی-نین” فعالییتلری و سون گونلر یارانان ” باتی آزربایجان گنجلر بیرلیگی” بو یولدا آپاریلان فعالییتلرین و حساییتلرین دیرلی بیر گؤستریجی‌سیدیر. باشقا ایفاده ایله، داخیلده‌کی بو قوروملار و فعالییتلر قطعی صورتده اؤز نتیجه‌سینی وره‌جک و داغیناق میللی قوووه‌لرین، اؤزللیکله‌ده گنجلرین سیستئماتیک فعالییتینه ایمکان یاراداجاق. بو تشکیلاتلانمالار البتده‌کی زامانیندا عوموم خالقین پوتانسییه‌لینی سورعتله توپلاییب مودافیعه سنگرلرینی ییخیلماز قالایا چئویریب توپراقلاریمیزدا گؤزو اولان تئروریست قروپلارین بورنونو اوواجاقدیر.
عزیز اوستاد چکدیگینیز زحمتدن دولایی و بیزه نئت و گوزل تسبیتلرینیزدن اوتورو تشکور ائدیریک.
باتی آزربایجان گنجلر بیرلیگی
بو یازسی تبریز سسی امکداشلاری طرفینده‌ن عرب الیفباسینا کوچورولوبدور
