بوگون ۲۸ می آذربایجان خالق جمهوریتی‌ قورولوشونون ایل دؤنومودور. آذربایجان خالق جمهوریتی محمد امین رسول‌زاده و آرخاداشلارینین ۱۹۱۸ ایلینده قوردوغو دوغو دونیاسینین ایلک لائیک و دموکراتیک جمهوریتی‌دیر.
۱۹۱۸.جی ایل ۲۸ می‌‌ده بوتون اؤلکه‌لرین رادیولاری و قازئته‌لری آذربایجانین باغیمسیزلیغینی دونیایا یایدی‌لار. فتحعلی‌خان خویسکی‌نین باشقان‌لیغی ایله آذربایجان دموکراتیک جمهوریتی حوکومتی تشکیل اولوندو. بئله‌لیک‌له، آذربایجان خالقی تورک دونیاسیندا و بوتون دوغو اسلام عالمینده ایلک دفعه اولا‌راق جمهوریت قورموش اولدو.رسول زاده آذربایجان گنجلیگینه بو جمهوریت و بایراق قونوسوندا بئله سسلنیر:
“ای گنج‌لیک! ای تورک گنج‌لیگی! سنین عهده‌نده بؤیوک بیر وظیفه وار! سندن اولکی نسیل یوخ‌دان بیر بایراق، مقدس بیر ایده‌آل رمزی یاراتدی و اونو مین مشکلاتلا یوکسلدرک دئدی کی، بیر کره یوکسلن بایراق بیر داها ائنمز! البته، سن اونون بو اومودونو قیرمایا‌جاق، آذربایجان تورکلری‌نین یانیق‌لی نغمه‌لرینه قونو اولموش، اورکلرینه ائنمیش بو بایراغی بیر داها او بینا اوزرینه دیکه‌جک، بو یولدا یا غازی، یا دا شهید اولا‌جاقسان!”
رسول‌زاده و سیلاح آرخاداشلارینین یئری اوچماق، آذربایجان جمهوریتی‌نین عمرو ابدی اولسون!