تبریز سسی خبرـ یوروم سیته‌سی‌نین یادداشتی؛ گونئی آزربایجان‌دا ۱۹ اردیبهشت اؤیرنجی گونو
تورک‌لرین ان آدلیم دونیا شؤهرتلی، هر یانا یاییلمیش، هر یئرده بیتمیش، هامیلار اونو یییه‌لنمیش (چین‌لی‌لر، هیندلی‌لر-بودا دین‌لی‌لر،عرب‌لر-آی سایلی”قمری”آیلار ها بئله…)،بیزده، اؤزوموزده-تورک‌لرده “آز.تورک‌لرینده ده” ،ایتیریب-باتیریلیب-اونودولموش ۱۲ حیوان‌لی تقویمی‌میزله دئسک “بوغا “آیینین ۱۹ـو ایلدؤنومونه یاخینلاشیریق. فارس ایمپراتورو ایستعماری بویوندوروغو آلتیندان هله‌لیک چیخابیلمه‌دیگیمیز اوچون اونا “۱۹- اردیبهشت گونئی آزربایجان اؤیرنجی گونو” دئییریک.
بو گون ۱۳۷۴-گونش(۱۹۹۶-میلادی) دن یاراندی، ازجا عاغلین ایشله‌دن گونئی آزربایجان تورکلرینه بو ایستعماری تانیماقدا بیر پوزولمایان-سیلینمه‌یه‌ن ایز-نیشان دا یاراندی، قالدی. پارچالانمیش وطنیمیزین بیر بؤلومو “قوزئی آزربایجان”روسیه ایستعماریندان قورتولوب، اؤزگورلویه-ایستیقلالا چاتمیش، میللی حوکومت تمللرینی یارادیب تکمیللشدیرمه‌دئیدی. آما ایرانلا روسیه ایستعماری (بیری گیزلین، بیری آیدینجاسینا) ائرمنی قولدورلاری-نیژاد پرستلرینی اونون جانینا سالیب هرگون فاجییه -سویقیریم یاراتماقدایدیلار. بئله‌لیکله بو گونده جومهوری ایسلامی آدیلا تانینان ایران ایستعماری او تایین بو تای آزربایجان‌ا ائتکیسینین ماهاریندان آرخایین اولاراق گونئی آز.لیلارین اوستونده چئشیدلی یوخلاییشلار (تئست‌لر)یاپماقا باشلامیشدی. بو تئست‌لرین بیریسی ده تئهران‌دا تئلئویزیونون “تحقیقات-مطالعات-سنجش مرکزی “آدلی یئردن سوی‌چولوق (نیژادپرستی)تئست‌لری یایماغیدی. بونلارین بیریسی‌ده بوتون تئهران‌دا یاییلان”۵۹ ن.لی توپلوم آراسی” تئست‌ایدی، اوردا بو سورولارا جاواب ایسته‌نیلیردی :
ائولنمک نییتینده، بیر تورکله ائولنمه‌یه حاضیرمیسینیز؟
قیز اوغولونوز اولورسا، ائولنمک ایسته‌ینده، بیر تورکه وئرمه‌یه حاضیرمیسینیز؟(اوغول اوغلان-ارکک آنلامیندا یوخ اوشاق-بالا- جوجوق-ائولاد-فرضینده آنلامینی داشیییر.)
تورکلر دسته‌لرینده اؤزل “عاشورا –تاسوا”تک رسملرده اولماغی سئویرمیسینیز؟
ائو آلمادا، بیر تورکله دوواربیر قونشو اولمانی بیلنده، اونلارین تؤره‌نینه گئدرمیسینیز؟
بیر تورکله بیر اوتاقدا-ایش‌داش کیمی، ایشلرمیسینیز؟
تورکلر چوخلوغو محلله‌ده ائو آلارمیسینیز؟
بیر تورکجه گل-گئد، قوناقلیقلارا نئجه‌سینیز؟ و باشقا.
تئهران بیلیم‌یوردونون(یونیوئرسیته‌سینین) اؤیرنجی‌لری بونو سوی‌چولوق ایزلری بیلدیره‌رک دیللنمه‌یه(اعتراضا) کئچیب، تبریزه‌ده یوللاماقلا، تبریز بیلیم‌یوردو(دانیشگاهی) دا موخالیفته کئچیر ،۱۹-اردیبهشت‌ده گون اورتا چاغی دانیشگاه اؤنونده خییاوان‌دا ییغینجاق باشلانیب شهر اورتاسینا دوغرو گئتمه باشلانیر، قووالا –قاچمالا ، توتوب ـیاخالامالار باشلانیر دانیشگاه کئچیدیندن اویانا کئچه‌بیلمیرلر. ایچریده قالانلاری وحدت تالارینا ییغیب اوستاندار اونون صدا و سیما (دئولت)تی‌‌وی ایشی اولمادان و اونون آدی ایله یاییلدیقدان خبر وئریر، کیمسه اینانمادان اینتیظامی و “لیباس شخصی دئولت گوروه‌لاری”هرنه‌یه سون قویور آما دولاییسییلا اورمیه بیلیم‌یوردو‌دا بو کیمی تئست‌لره قارشی چیخیر، گئت-گئده تورک یوردلو باشقا بیلیم یوردلاری دا قارشییا چیخیر، سونوج‌دا رادییو-تئلویزیون سراسری مرکزی، بونو ائشیکدن دستور آلانلارا باغلاییب اونلاری تانیتدیریب جزالاندیرماسینین قوولونو وئریر. ایندی ۲۰- ایله یاخیندیر کیمسه بیلمیر او تئستی یارادان-یایانلار کیمدی و نه اولدولار. ۱۱ ایل اوندان سونرا، دئولت اورگانی “ایران قازئته‌سی” آچیق-آیدین “تورک‌لرین اؤلمه‌لی و اؤلدورولمه‌لی اولماسی” تئستینی بیر طنز-کاریکاتور قالیبیندا “سوسری-تووالئت پیسپیساسی”باشلیغی (سرمقاله‌سی )ادیندا، یایماقا باشلادی. چوخلو چکیش-برکیشلردن سونرا بو دؤنه ائل دانیشگاه‌لارا آرخا دوراراق خوردادین بیری -۱۳۸۵ده، ۲۸ ـ گونئی آزربایجان شهرینده قالخیش (اعتیراض)لار اون گون تامام سوره‌رک باشلاندی، آزجا قورورو، اینسانییتی، دوشونجه‌سی اولانلارا بللی اولدو حوکومتین آدی نه اولور اولسون اؤزو و ایشی “فاشیستی-راسیستی-سوی‌چولوق ” حوکومتیدیر و بوندان باشقاسی دا اولا بیلمز، داها بیزگونئی آزربایجان تورکلرینه “اؤزگورلوک- ایستیقلال” ایسته‌ییب بیتیرمکدن سونرا بیر شئی قالمیر.
