داوود توران: بیز تنقیدلرله بؤیویه‌جه‌ییک
گونئی‌لی سوسیولوق و آزربایجان میللی دیره‌نیش تشکیلاتینین (آم‌دت) کاتیبی داوود توران آمئریکانین سسی‌نه موصاحیبه‌ده مؤوجود گونئی‌لی تشکیلاتلارین ماهیت و فونکسییاسی حاقدا دانیشیب. او، همچنین تشکیلاتلارین یارانماسینا سبب اولان ضرورتلر ایله اونلارین فعالیتلری آراسینداکی علاقه‌لر خصوصوندا سواللاری جاوابلاندیریب.
داوود تورانین سؤزلرینه گؤره، گونئی آزربایجان معاصیر تاریخینده تشکیلاتچیلیق پروسئسلرینه باخاندا میللی حرکاتدان بحث ائدیلیب، لاکین هدفلر هئچ‌ده همیشه بللی اولماییب. بو اوزدن تشکیلاتلارین منیمسه‌دیکلری آدلاردا عمومی اولوب، کونکرئت اولماییب.
آم‌دت کاتیبینین فیکرینجه حاضیردا گونئی تشکیلاتلاری و قروپلارینین ماهیت و فعالیتلری آراسیندا فرقلری گؤرمک اوچون اونلاری اوچ کاتئقورییایا بؤلمک اولار: فئدئرالیست قروپلار، گونئی آزربایجانین موستقیللیگی اوچون موباریزه آپارانلار و آزربایجانا ایران ایچریسینده موختاریات طلب ائدنلر.
“آزربایجان میللی دیره‌نیش تشکیلاتی اؤز هدفینی گونئی آزربایجان تورکلرینین اؤز موقددراتینی تعیین ائتمه حاقینا نایل اولماق شکلینده موعین ائدیب،” دئیه توران منسوب اولدوغو تشکیلاتین مقصدینی ایضاح ائدیب.
داوود توران فرقلی دوشونجه‌لره صاحیب اولان اینسانلاری جلب ائتمک و توپلوم ایچینده گئنیشلنمک باخیمیندان تشکیلاتلارین اوغورسوز اولماسینین سببلری ایله باغلی اؤز فیکیرلرینی پایلاشیب. اونون دئدیکلرینه گؤر، “گونئی آزربایجان تشکیلاتلارینین سیاسی تجروبه‌لرینین آز اولماسی و مئدیا گوجونه صاحیب اولمادیقلاری اوچون توپلومون موختلیف طبقه‌لری ایله علاقه قورماقدا چتینلیک چکیرلر.”
آزربایجانلی سوسیولوق تنقیدین سیاسی حرکاتلاردا اؤنملی رول اوینادیغینی وورغولاییب.”تنقید وارسا، دئمک کی حرکت واردیر. تنقید آکتیولییه یول آچار و بیز میللی حرکت اولاراق او تنقیدلرله بؤیویه‌ریک،” دئیه داوود توران تشکیلاتلارین فعالیتلرینی تنقید ائتمک یئرینه تشکیلاتلانماق مسئله‌سینی کؤکدن سوال آلتینا آلان باخیشین دوزگون اولمادیغینی وورغولاییب.
آمئریکانین سسی/علیرضا قولونجو
بو یازی تبریز سسی امکداشلاری طرفیندن عرب الیفباسینا کوچورولوبدور
بو مصاحبه نی بوردان دینله یه بیلیرسینیز