باریش حیدری: اوغلوم آتاسی ایله شوشه آرخاسیندان دئییل، اوزبوز گؤروشمک ایسته‌ییر
“بو، محمود سوز کئچیردیگیمیز ایکینجی باهاردیر… تبریز زیندانیندا اوزبه‌اوز گؤروشمه‌یه ایجازه وئرمیرلر. اوغلوم آتاسینی آنجاق شوشه آرخاسیندان گؤره‌بیلیر، بو اونون اوچون چوخ چتیندیر،” دئیه تبریز زیندانیندا ۹ ایللیک حبس مودتینی چکمک‌ده اولان گونئیلی سیاسی فعال و یئنی گاموح تشکیلاتینین عوضوو محمود فضلی‌نین حیات یولداشی آمئریکانین سسی‌نه موصاحیبه‌ده سؤیله‌ییب.
باریش حیدری‌نین سؤزلرینی گؤره، ایران ایسلام رئسپوبلیکاسی هر ایل بایرام گونلرینده بیر چوخ محبوسا مأذونیت حاقیندان ایستیفاده ائتمک و یا عاییله ایله اوزبه‌اوز گؤروشمک ایمکانی وئریر. آنجاق معالیجه اوچون مأذونیته چیخمیش بهبود قلیزاده ایستیثنا اولماقلا، یئنی گاموح تشکیلاتینین عوضولری بو ایمکانلاردان یارارلانا بیلمه‌ییب. “بو محمودسوز کئچیردیگیمیز ایکینجی بایرام ایدی.تسوفله اوزبه‌اوز گؤروشمه ایمکانی‌دا وئرمیرلر. یاخیندا یئنه ده تبریز زیندانینا گؤروشمه‌یه گئده‌جگیک. اوغلوم دئییر، من یئنه‌ده آتامی شوشه آرخاسیندان گؤره‌جگم؟ من شوشه‌نین او تایینا گئتمک ایسته‌ییرم، آتامین یانیندا قالماق ایسته‌ییرم،” دئیه باریش خانیم بو گونلرین خصوصیله اوغلو آتیلا اوچون چوخ چتین کئچدیگینی وورغولاییب.
۲۰۱۲-جی ایلین دئکابری و ۲۰۱۳ یانوار و فئورال آیلاریندا اطلاعات مأمورلاری طرفیندن حبس ائدیلمیش یئنی گونئی آزربایجان میللی اویانیش حرکاتی (یئنی گاموح) تشکیلاتینین لیدئرلری محمود فضلی، یوروش مهر‌علی‌بگلو (آیت)، لطیف حسنی، شهرام رادمهر و بهبود قلیزاده غئیری-قانونی تشکیلات قورماق” و “ایران ایسلام رئسپوبلیکاسینا قارشی تبلیغات آپارماق”دا ایتتیهام ائدیله‌رک هر بیری ۹ ایل حبسه محکوم ائدیلیب.
“زیندان مسئوللاری دئییر کی، اونلار مأذونیت حاقیندان ایستیفاده ائتمک اوچون حبس مودتلرینین ان آز آلتیدان بیرینی کئچیرمه‌لیدیرلر،” دئیه باریش حیدری بیلدیریب.
یئنی گاموح وب صحیفه‌سینه ایستینادن، محمود فضلی زیندان مسئوللاری طرفیندن معروض قالدیغی تضییق‌لره اعتیراض اولاراق بیر نئچه گوندور کی، آجلیق آکسییاسینا باشلاییب.
آمئریکانین سسی/علیرضا قولونجو
بو یازی تبریز سسی امکداشلاری طرفیندن عرب الیفباسینا کوچورولوبدور