یمن جومهور باشقانی ایرانی اؤلکه سینین ایچ ایشلرینه قاریشماسیندا سوچلاییب دیر. عبد ربه منصور هادی “الحیات” قزئته سینده آچیقلادیغینا دایاناراق؛ ایرانی یمنده کی سیلاحلی گروپلارا دستک وئرمه سینده ایتتیهام لاییبدیر. هادی یمن جومهور باشقانی الحیات قزئته سی ایله آپاردیغی موصاحیبه ده دئییب:  “ایرانی یمن ده کی سیلاحلی گروپلارا وئردیگی دسته یی سونلاندیرمایا و ایکیلی ایلیشکی لری قارداشلیق اوزره قورماغا چاغیریریق”.

او بو سؤیله شی ده آرتیریب: ایرانلی قارداشلاریمیزدان داها اؤنجه ده یمن خالقینا قارشی آپاردیقلاری یالنیش سیاستی گؤزدن کئچیرمه سینی ایسته دیک آنجاق سونوج وئرمه دی”.

ساوالان پورت-ون بیلگیلرینه اساسن ؛ منصور هادی نین دئدیکلرینه گؤره ، ایران یمن`ین گونئیینده اولان آیریلیقچی گروپلار و شیعه تروریست گروپلاریندان حیمایه ائدیر. ایرانین حیمایه ائتدیگی گروپلار قوزئی ده”حوثی لر” و گونئی ده ایسه “حراک جنوبی” آدلاندیغی تروریست گروپلاریدیر.آرتیرمالییق کی؛ ایران خاریجی ایشلر باخانلیغی نین سؤزچوسو مرضیه افخم بو ایددیعالاری ردد ائدیب و بو سؤزلری اساس سیز اولاراق قئید ائدیب دیر.

ایران دفعه لرجه قونشو اؤلکه لری طرفیندن ایچ ایشلرینه قاریشما ایتتیهامی ایله سوچلانمیشدیر و بو بیرینجی دفعه دئییلدیر. افغانیستان ، آزربایجان ،عیراق کیمی اؤلکه لر دؤنه-دؤنه ایرانی اؤز ایچ ایشلرینده موداخیله ائتمه سی ایله ایلگیلی سوچلامیشلار.

امراله صالح افغانیستانین کئچمیش میللی تهلوکه سیزلیک رئیسی “بی بی سی پشتو” سایتینا یازدیغی مقاله ده ایرانین افغانیستاندا ایکی اوزلو سیاستیندن آچیقلیق گتیریبدیر. بی بی سی فارسجایا ایستینادن؛  امراله صالح بو مقاله ده یازیر: “افغانیستان اؤزونو تامین ائتمک گوجونه وارمایینجا ، هر زامان ایران طرفیندن تهلوکه سیزلیک باخیمیندان تهدید اولوناجاق”. ایرانین شیعه اولان موخالیف گروپلاری دستکله مه سی حاقدا “قم” و “سپاه”ین ائتکیلی رولو اولدوغونو وورغولامیشدیر.

ایرانین عیراق و اؤزللیکله آزربایجان جومهوریتینین ایچ ایشلرینه موداخیله ائتمه سی حاقدا بو قونشو اؤلکله لری طرفیندن اعتیراضلارا معروض قالمیشدیر. آزربایجان تهلوکه سیزلیک اؤگوتو و باشقا دؤولت رسمیلری دفعه لرجه ایرانی آزربایجانین ایچ ایشلرینه قاریشماسی و ترور عملیاتلاری پلانلاشدیرماسیندا سوچلامیشدیر.