«تبریز فولکلور اؤرنکلری» کیتابی چاپدان بوراخیلیب
میللی علملر آکادمییاسینین فولکلور اینستیتوتونون نشر ائتدیی کیتاب ایراندا یاشایان آذربایجانلیلارین فولکلور توپلوسودور. آذربایجان میللی علملر آکادمییاسینین فولکلور اینستیتوتو «تبریز فولکلور اؤرنکلری» (I کیتاب) توپلوسونو نشر ائدیب. لاییحهنین رهبری فولکلور اینستیتوتونون دیرئکتورو موختار کاظیم اوغلو، توپلاییجیلاری کاظیم عباسی، احد فرهمندی، علی برازهنده، محمد علیپور مقددهم، رئداکتورو سکینه قایبالییئوادیر. بو بارهده مئدیا فوروم سایتی معلومات یاییب.
کیتابین گیریشینده بیلدیریلیر کی، بو گون دونیادا عمومی سایی ۵۰ میلیونو اؤتموش آذربایجان تورکلرینین ائتنیک تفککورونو جانلاندیران، دیلینی، تاریخینی، معنوی عالمینی قورویوب ساخلایان زنگین شیفاهی سؤز صنعتینین – فولکلور ارثینین توپلانماسی، سیستئملشدیریلمهسی و نشری ایلک نؤوبهده حلی واجیب مسئلهلردندیر: «بو ضرورتی نظره آلان فولکلور اینستیتوتو اکثریتی اؤز دوغما آتا-بابا یوردوندا یاشایان سویداشلاریمیزین قورویوب گونوموزدک ساخلادیغی شیفاهی خالق ادبیاتی نومونهلرینین آیری-آیری سئرییالار آلتیندا، چوخجیلدلیکلر شکلینده آردیجیل چاپ اولونماسینا بؤیوک اهمیت وئریر.
آرازین او تاییندا یاشایان آذربایجان تورکلریندن توپلانمیش فولکلور اؤرنکلرینین یئر آلدیغی توپلولارین محض بؤلگهلر اوزره آدلاندیریلماسی نشر اولوناجاق نؤوبتی جیلدلرده رئگیونال خصوصیتلرین قورونوب ساخلانیلماسی، بؤلگهلرین داها گئنیش میقیاسدا احاطه اولونماسی مقصدی داشیییر».