“منی تهدید ائتدیلر کی، اوغلومون وضعییتی ایله باغلی مئدیا ایله دانیشماییم. من ده دئدیم، اوغلوما اذیت وئرمەیین، اونونلا یاخشی رفتار ائلەیین، اوزبە اوز گؤروشمه ایمکانی وئرین کی، من ده موصاحیبه وئرمەییم. ” بونلار قیزیل حصار زیندانیندا مارت آیینین ۱۱-دن آجلیق آکسییاسینا باشلامیش گونئیلی امەک فعالی شاهرخ زمانی -نین آناسی زرین نجاتی -نین سؤزلریدیر. اوغلونون امکچیلرین حوقوقلارینی مودافیعه ائتمکدن باشقا هئچ بیر گوناه ایشلتمەدیینی دیین گونئیلی آنا آمئریکانین سسی ایله صؤحبتینده محبوس اوغلونون زیندان مسئوللاری طرفیندن اذیت و باسقیلارا معروض قالدیغینی وورغولاییب.

“اوغلومو رجایی-شهر زیندانیندان قیزیل حصار زیندانینا، نارکومانلارین یانینا کؤچوروبلر، او دا بونا ائعتیراض ائدیر و آجلیغا باشلاییب. سیاسی محبوسون نارکومانلارین یانیندا ساخلانیلماسی هارادا گؤرونوب؟ اونا نییه اذیت وئریرلر؟ بیز نئچه گوندور آغلاییریق، بو دا ایسلام جومهورییتینین بیزه بایرام گونلرینده وئردییی بایراملیغی اولدو،” دئیه او سؤیلەییب.

“ایندیکی وضعییت شاه دؤوروندن داها پیسدیر. او دؤورده منیم قوهوملاریندان بیری حبسده ایدی. بایرام گونلرینده هئچ اولماسا اوزبە اوز گؤروشمەیه ایجازه وئرەردیلر. . . شاهرخ -ون اوزبە اوز گؤروشمه حاقی یوخدور. آوتوبوسلا تبریزدن کرجه ۱۰ ساعات یول گئدیریک، سادەجه ۱۰ دقیقه شوشه آرخاسیندان گؤروشمەیه ایمکان وئریرلر،” زرین خانیم قئید ائدیب.

 تبریزلی آنا اوغلونون زینداندا موختلیف تضییقلرله اوزلشدییینی دئییب. ”اونا اذیت وئریرلر، وکیلی ایله گؤروشمەسینه ایجازه وئرمیرلر. شاهرخ قانوندا اولدوغو کیمی آچیق هاوایا چیخماق، عائیله سی ایله تئلئفونلا دانیشماق حاقینین وئریلمەسینی ایستییر.”

 زرین خانیم اوغلونون هر هانسی بیر گوناه ایشلتمەدییینی وورغولاییب. اونون سؤزلرینه گؤره شاهرخ زمانی بیر ایشچی و ایشچی بیرلییی عوضوو کیمی زحمتکئشلرین حوقوقلاریندان مودافیعه ائدیب. اونلارین سیغورتا ایله تامین ائدیلمەسینی ایستەییب.

 حاضیردا ۲۰۱۱-جی ایلده محکوم اولدوغو ۱۱ ایللیک حبس جزاسینی چەکمکده اولان شاهرخ زمانییه قارشی تطبیق ائدیلن باسقیلار سادەجه زیندان مسئوللارینین اذیتلریندن عیبارت اولماییب. زینداندا ایکن یئنی ایتیهاملار و موحاکیمەلرله اوزلەشن زمانی تبریز اینقیلاب محکمەسی طرفیندن ”ایرانین عالی روحانی لیدئرینی تحقیر ائتمک” مادەسی ایله گوناهلاندیریلاراق ۶ آی علاوه حبسه محکوم ائدیلیب.

 زرین نجاتینین سؤزلرینه گؤره، زیندان مسئوللاری باشقا بیر محبوسو محکمه ده شاهرخا قارشی شاهیدلیک ائتمەیه مجبور ائدیبلر :

“من ده او محکمەدەیدیم. اوغلوما قارشی شاهیدلیک ائدن اؤزو منه دئدی کی، زیندان مسئوللاری اونو تهدید ائده رک بونا مجبور ائدیبلر. اونلارین دئدییینه گؤره، اوغلوم حبسخانادا تئلویزییایا باخدیغی زامان ایرانین عالی رهبرینه آلچالدیجی سؤزلر دئییب.”

 خانیم نجاتی آمئریکانین سسی واسیطەسیله حوقوق مودافیعچیلری او جوملەدن، ب م ت -نین ایراندا اینسان حاقلاری دورومو اوزەره خوصوصی نومایندەسی احمد شهید، ائلەجه ده ژورنالیستلر و ملی فعاللارا موراجیعت ائدیب :

“اینسان حاقلاری فعاللاری، تورک قروپلاری و احمد شهید دن ایستییرم کی اوغلومو مودافیعه ائتسینلر. او، هئچ نه ائتمەییب. آنجاق ایشچیلرین حاقینی مودافیعه ائدیب. . . اولا بیلر کی، اطلاعات حبسخاناسیندا ساخلانیلدیغی زامان، تضییقلره دؤزمەییب و مسئوللارا قارشی آغیر سؤزلر دئییب. . . بو قەدر، باشقا هئچ بیر گوناهی یوخدور.”

 بو یازی یوردنت طرفیندن عرب الیفباسینا کوچورولموشدور

۲۰۱۴-۰۴-۰۱ ۱۱:۱۴:۴۸