آزربایجان میللی دیرنیش تشکیلاتی نین سورگونده گونئی آزربایجان مجلیسی ایله باغلی بیلدیرسی
آزربایجان میللی حرکتی نین ان اؤنملی سورونلاریندان بیریسی شبهه سیز دونیادا اؤزونو نه شکیلده تمثیل ائتمه مسئله سیدیر. میللی حرکتین کوره سللشمه سی و بؤلگه سل دگیشیکلیکلر ایله اورتایا چیخان بو سورون، سون ایللرده خاریجده یاشایان میللی فعاللار و قوروپلار طرفیندن چؤزولمک ایسته نسه ده نه یازیق کی بوگونه قدر جیددی بیر باشاری الده ائدیلمه ییبدیر. گونوموزه قدر قورولان شورا، کونسئی، بیرلیک و جبهه لر گونئی آزربایجان ین تمثیلیت سورونونو اورتادان قالدیرمیش دئگیل دیر.
سون گونلرده اولوشماغا باشلایان سورگونده گونئی آزربایجان میللی مجلیسی تشبوثو بو مسئله نی بیر داها گوندمه گتیرمیشدیر. دیرنیش تشکیلاتی آدی کئچن تشبوث ایله یاخیندان علاقه دار اولسا دا توپلانتییا قاتیلما شرایطی ساغلانمامیشدیر. یالنیز دیرنیش تشکیلاتی اولاراق بو مسئله ایله باغلی گؤروشوموزو بیلدیرمک احتیاجی حیس ائتدیک.
البتته گونئی آزربایجان دونیاداکی تمثیلیت مسئله سینه چؤزوم گتیرمک مجبوریتینده دیر. بوگون اعتباری ایله گونئی آزربایجانین تمثیل مسئله نین اوزرینده جیددی چالیشماق و یول خریطه سینی چیخارتماق لازیم دیر. ایندیلیک ایچریده بئله بیر ایمکان اولمادیغی اوچون بو مسئله خاریجده فعالیت گؤسترن میللی فعالار و تشکیلاتلار طرفیندن گرچکلشه بیلر. آما بورادا دیققیت ائدیلمه سی گرکن بیر نئچه موضوع واردیر:
– بیر میلتین تمثیل مسئله سینی حل ائتمک اوزون سوره لی چالیشمالار نتیجه سینده اولا بیلجک بیر ایشدیر و عجله یه گلمز. بونون اوچون ده دونیادا کی اؤرنکلرینی یاخشیجا اینجه لمک لازیم.
– بو تشبوث هر نه قدر خاریجده اولسا دا داخیلدن قوپوق و بی خبر شکیلده اولمامالیدیر. موطلق داخیلین فیکیرلری و گؤروشلری آلینمالیدیر.
– تشکیلاتلار آراسی دیالوق و ایش بیرلیگی قروپونون تشکیل تاپماسی بو ایشین ایلکین آددیم لاریندان دیر. تشکیلاتلار آراسیندا دیالوگون اولمادیغی بیر اورتامدا میللی مجلیسین قورولماسی و والیغینی سوردورمه سی هارداسا ایمکانسیزدیر. دیالوق و ایش بیرلیگی شوراسی طریقی ایله کئچمیشده کی سورونلار گؤز قاباغینا آلیناراق میللی حرکت ایچریسینده دیالوق کولتورو اؤز یئرینی تاپمالیدیر.
– بیر سونراکی آددیمدا ایسه دیالوق و ایش بیرلیگی قروپونون تشبوثو ایله چالیشما کمیته لری اولوشدورولمالیدیر. بو کمیته لر واسیطه سی ایله قورولاجاق اولان یئنی تمثیل قورومونون ویزیونو، ایشلوی، اوزون و قیسسا موددتلی سیاستلری، حقوقی یاپیسی، مالی سیستئمی و بو کیمی مسئله لر اوزینده تفروعاتلی چالیشمالار آپاریلمالیدیر. بونون اوچون ده میللی مفکوره لی متخصیص و اوزمانلاریمیزدان دعوت ائدیلمه لیدیر.
– دیالوق و ایش بیرلیگی شوراسی و چالیشما کمیته لرینده داها اؤنجه قورولان اورتاقلیق و تمثیل تشبوث لرینده ندن باشاریسیز اولوندوغونو دارتیشیماق داها ساغلام بیر یاپی اولوشدورماغین شرطلریندن دیر.
– اولوشاجاق قورولوشدا مشروعیت مسئله سی دیققته آلینمالیدیر. بو قورولوشون مشروع اولا بیلمه سی اوچون قورولوشا قاتیلیم ان یوکسک سویه ده اولمالیدیر و قورولوش مومکون اودوغونجا میلتیمیزین بوتون طبقه لرینی تمثیل ائتمه لیدیر. فیکیر و دوشونجه سیندن آسیلی اولمایاراق گوئنی آزربایجان میللی منفعتلری اوزره جیددی و خالق طرفیندن اعتیبار گؤرن هرکسدن دعوت اولونمالیدیر. بو سورجده بوتون ایشلرده شفافیت گؤستریلمه لی و آلینان قرارلار آچیق شکیلده خالقلا پایلاشیلمالیدیر.
بیر داها خاطیرلاتماق ایستردیک کی بیز آزربایجان میللی دیرینش تشکیلاتی اولاراق آزربایجان میللی حرکتی ایچریسینده قالیجی بیرلیک و برابرلیک یارداجاق هر ایش و تشبوثه دستک وئریریک. یالنیز بو تشبوث و چالیشمالارین دوزگون علمی و عملی متدلارلا قاباغا آپاریلماسی گرکدیگی قناعتینده ییک.
آزربایجان میللی دیرنیش تشکیلاتی
26 03 2014
