واحید قاراباغ‌لی: روحانی سؤزلرینه عمل ائتمه‌ییب، حقوق پوزونتولاری چوخالیب
ینسان حاق‌لاری قروپ‌لاری و اولوسلارآراسی لیدئرلر، او جمله‌دن ب.م.ت-نین باش کاتیبی بان کی مون جمهورباشخانی حسن روحانی‌نین ایراندا اینسان حاق‌لاری و فردی آزادلیقلاری گئنیشلندیرمه‌یه دایر سسلندیردیگی شعارلار و وئردیگی سؤزلره عمل ائتمدیگینی دئییرلر. مؤوضو ایله باغلی آمئریکانین سسینه موصاحیبه وئرن گونئی‌لی ژورنالیست و حقوق مودافیچی‌سی واحید قاراباغ‌لی حسن روحانی حکومتی دؤورونده اینسان حاق‌لاری دورومو ایله باغلی موسبت بیر دئییشیک‌لیک گؤرمدیگی، هله بعضی ساحه‌لرده اینسان حاق‌لاری پوزونتولاری‌نین آرتدیغینی وورغولاییب.
« روحانی گلدیک‌دن سونرا، آزادلیق‌لار آرتمادی، حاق‌لاری وئریلمه‌دی. او، سئچکی‌لر زامانی و اوندان سونرا مدنی- فردی حاق‌لار و آزادلیقلاری او جمله‌دن، مئدیا و سؤز آزادلیغی، قادین‌لار، ائتنیک قروپ‌لار، دینی آزلیق‌لار، اؤیرنجی‌لر و سیاسی محبوس‌لارین دورومونون یاخشیلاشماسینا سؤز وئردی. آزربایجانا سفرینده تورک دیلی قورومونون یارادیلماسی و اورمیه گؤلو ایله باغلی وعدلر وئردی. آنجاق، عملده بیر دئییشیک‌لیک اولمامیش، حتی بعضی ساحه‌لرده وئریلن وعدلرین تام عکسینه عمل ائدیلمیش،» دئیه قاراباغ‌لی سؤیله‌ییب.
حقوق مودافیچی‌سی‌نین دئدیک‌لرینه گؤره، بعضی سیاسی قروپ‌لار و فارس‌دیل‌لی مئدیا حسن روحانی حکومتی ایله اورتاق ماراق‌لار گوردوک‌لری اوچون یانلیش معلومات یایا‌راق دورومو یاخشی گؤسترمه‌یه و توپلومدا ساختا بیر کوللئکتیو شعور یاراتماغا چالیشیرلار:
«دونیادا و ایران توپلوموندا، احمدی نژاد دؤنمی‌نین بیتمه‌سی و روحانی‌نین گلمه‌سی ایله آزادلیق‌لار چوخالیر و اینسان حاق‌لاری گئنیش‌لنیر شکلینده یانلیش منظره یارا‌دیرلار. آنجاق ایدعا‌لارینی اثباتلاماق اوچون اورتایا هر هانسی بیر فاکت آتماییب، ساده‌جه روحانی‌نین صحبت‌لری و وئردیگی سؤزلره اساس‌لانیرلار.»
قاراباغ‌لی همچی‌نین حاضیردا محمود احمدی نژاد دؤورو ایله موقاییسه‌ده ایرانلا باغلی فعاللیت گؤسترن اینسان حاق‌لاری تشکیلات‌لاری‌نین داها پاسسیو موقع سرگیلدیک‌لرینی بیلدیریب.
«بعضی اینسان حاق‌لاری قروپ‌لاری اصلینده سیاسی جریان‌لارین تأثیرینده‌دیرلر. بون‌لار اینسان حاق‌لاری فعالیتینه اؤز سیاسی ماراق‌لاری ایستیقامتینده بیر تاکتیک کیمی یاناشیر، ایستدیک‌لری سیاسی گؤروش حاکمیتده اولمایاندا، موقتی اولا‌راق اینسان حاق‌لاری فعالیتی ایله مشقول اولورلار. بو دورومدا، گئرچک حقوق مودافیعه چی‌لری‌ده یالنیز قالیب و کئچمیشده اولدوغو کیمی سیاسی قروپ‌لارین صاحب اولدوغو مئدیا و اولوسلارآراسی علاقه‌لردن ایستیفاده ائتمک شانسینی دا ایتیریرلر،» دئیه او سؤیله‌ییب.
بعضی ساحه‌لرده اینسان حاق‌لاری پوزونتولاری‌نین کسکین آرتدیغینی قئید ائدن گونئی‌لی ژورنالیست روحانی حاکمیتین‌دن سونرا ایجرا ائدیلمیش اعدام حؤکم‌لری‌نین چوخالماسی، هابئله آزربایجان شهرلری و تهراندا دونیا آنا دیلی گونو ایله باغلی حیاتا کئچیریلمیش گئنیش حبس دالغاسینا دقت چکیب.
آمئریکانین سسی/علیرضا قولونجو
بو یازی تبریز سسی خبر قوروپو امکداشلاری طرفیندن کوچورولموشدور
