عباس لسانی: حسن روحانینین سیاستی خاریجده تعامل، داخیلده سرکوب دیر
حسن روحانی حؤکومتینده هم هاشیمینین پوپولیزمینی گؤروروک، هم ده خاتمینین ایصلاحاتچی شوعارلارینی. او، دونیا اؤلکەلری ایله اوزلاشماق، ایران ایچینده ایسه رئپرئسییا و باسدیرما سیاستینی یورودور.” بو فیکری دونیا آنا دیلی گونونده حبس ائدیلنلر سیراسیندا اولموش گونئیلی فعال عباس لسانی سسلندیریب. حاقیندا ب م ت و امنئستی اینتئرناسیونال کیمی بیر چوخ بئین الخالق قورومون بیانات چیخاردیغی تانینمیش فعال آمئریکانین سسینه موصاحیبه وئریب.
دونیا آنا دیلی گونو موناسیبتی ایله اهر شهرینده کئچیریلمیش توپلانتییا قاتیلدیغی اوچون قانونسوز توپلاشما و ایرانین ملی تهلوکەسیزلییینی پوزماق هدفی ایله تشکیلات قورماق ایتهامی ایله قارشیلاشان عباس لسانی اهرده باش وئرن اولایلار، توتولما، حبس و موحاکیمه پروسئسلری ایله باغلی دانیشیب. او همچینین حسن روحانی حؤکومتینین وئردییی سؤزلرله عملده یوروتدویو سیاست آراسینداکی فرقلری دەیرلندیررک، جمهور باشقانی روحانینین اصلینده ایراندا دئموکراتیک حرکاتلاری باسدیرماق ایستیقامتینده یازیلمیش سئنارینی ایجراچیسی اولدوغونو ایرەلی سوروب.
“دونیا آنا دیلی گونو یونئسکونون موعینلشدیردییی بیر گوندور. ایران دا بو موناسیبتی تانیییب. بو گونو قئید ائتمک اوچون اهر فعاللاری طرفیندن بیر توپلانتی تشکیل ائدیلدی و بیز ده چاغیریلدیق،” دئیه اردبیللی فعال اهرده کئچیریلمیش توپلانتییا نه شکیلده قاتیلدیغینی آچیقلاییب. اونون دئدیکلەرینه گؤره، مراسیم بعضی ایشتیراکچیلارین آنا دیلی ایله باغلی دانیشیغی، هابئله سازلی-سؤزلو چیخیشلاردان عیبارت اولوب.
لسانی پولیس مامورلارینین توپلانتینین کئچیریلدییی ائوه هوجومو، ائلەجه ده اؤزو و دیگر ایشتیراکچیلارین نظارت آلتینا آلینماسینی شرح ائدیب: ”مراسیمی کئچیرەرکن، ائوین پولیس مامورلاری طرفیندن موحاصیره ائدیلدییینی اؤیرندیک. . . اونلار چوخ کوبود شکیلده و بینیلمز داورانیشلار سرگیلیرک ائوه هوجوم ائتدیلر. . . ۱۰۰-ه یاخین ایشتیراکچی حبس ائدیلدی.”
تانینمی فعال حبسده ایکن، آذربایجان وئب صحیفەلری او و آلتی باشقا فعال طرفیندن یازیلمیش بیر مکتوبون تصویرینی نشر ائتدیلر. مکتوبدا ۷ فعال ایشکنجەیه معروض قالدیقلارینی قئید ائتمیشدیلر.
آمئریکانین سسی ایله موصاحیبەده همین مکتوبدا یازیلانلاری تصدیق ائدن سیاسی فعال معروض قالدیقلاری فیزیکی و روحی ایشکنجەلر حاقیندا دانیشیب: ”بونلار مراسیمه قاتیلان تقریبن ۱۰۰ فعالی نظارت آلتینا آلدیلار. محبوسلارین سایی چوخ اولدوغو اوچون زینداندا یئر یوخ ایدی. ۲۴ ساعات سونرا بزیلرینی بوراخیب، ۵۰-۶۰ نفری ساخلادیلار. سونرا گلیب منیمله بیرلیکده ۷ نفری چاغیریب دیگرلریندن آییردیلار. داورانیشلاری چوخ کوبود ایدی، آیاقلاریمیزی و آرخادان قوللاریمیزی باغلادیلار. گؤزو باغلی اولاراق بیر ماشینی میندیریب باشقا یئره آپاردیلار. سونرالار تبریزده بیر یئر اولدوغونو بیلدیک. اورادا فیزیکی و روحی ایشکنجه لره معروض قالدیق.”
امنئستی اینتئرناسیونال طرفیندن ویجدان محبوسو آدلاندیریلمیش ملی فعالین سؤزلرینه گؤره، توتولانلارا قارشی”قانونسوز توپلاشما و ایرانین ملی تهلوکەسیزلییینی پوزماق هدفی ایله تشکیلات قورماق” ایتهامی ایرەلی سورولوب. شرقی آذربایجان عدلییەسینین رسمی وئب صحیفەسی ده اهرده توتولان فعاللارا همین ایتتیهامین ایرەلی سورولمەسی ایله باغلی خبر یاییب. عدلییه ایدارەسی فعاللارین آنا دیلی گونو موناسیبتی ایله تشکیل اولونموش توپلانتییا قاتیلدیقلاری اوزوندن توتولدوقلارینی دا تصدیق ائدیب.
“توپلاشما دئدیکلری شئی آچیق بیر یئرده اولار، کی او دا قانونسوز دئییل. هالبوکی بیز بیر ائوده توپلانمیشدیق. بورادا قانونسوز اولان هئچ نه یوخدور،” دئیه عباس لسانی ایرەلی سورولن ایتیهامین یئرسیز و قانونلارا قارشی اولدوغونو وورغولاییب.
او، شرقی آذربایجان عدلییه ایدارەسی سایتیندا حبسلرله باغلی یاییلان خبری بیر ایقرار اولاراق دەیرلەندیریب :”سایتدا یازیلان خبری اوخودوم. منجه بو بیر ایقراردیر. اؤزلری ده اینسانلاری آنا دیلی گونونو قئید ائتدیکلری اوچون حبس ائتدیکلرینی ایقرار ائدیبلر.”
کئچمیشده ده ایللرله حبسده اولموش فعال ایراندا محکمه سیستئمینین موستقیل اولمادیغینی و تهلوکه سیزلیک قوروملارینین گؤستریشلری ایله حرکت ائتدییینی سؤیلەییب:
“محکمه سنددن سؤز آچاندا اصلینده اطلاعات امکداشلارینین حاضیرلادیغی حئساباتی دئییر. بو ایسه ایراندا محکمه حاکیمییتینین موستقیل اولمادیغینی گؤستریر.”
دونیا آنا دیلی گونو ایله باغلی گئنیش حبسلرین مؤعتدیل سییاستچی کیمی تانینان و فردی آزادلیقلار، هابئله ائتنیک جمعییتلرین حوقوقلاری و تورک دیلینین تدریسی ایله باغلی وعدەلر وئرمیش حسن روحانی حاکیمییتینده حیاتا کئچیریلمەسی وئب صحیفەلر و سوسیال مئدیانین موذاکیره مؤوضوعسو اولوب.
عباس لسانی علاوه ائدیب: “ایران ایسلام جمهوریتی ۲۰۰۹-جو ایلده کئچیریلن جمهور باشقانی سئچکیلریندن سونرا سیاسی بؤحرانلا قارشی قارشییا گلدی. حاکیمییت او بؤحرانی بیر تەهر آتلادا بیلدی، آنجاق یئنیدن ائله بیر بؤحرانلا اوزلشمک ایستەمیر. حسن روحانی ایسه بئله بیر بؤحرانلارین باش وئرمەسینی اؤنلەمک مقصدی ایله یازیلمیش سئنارینی ایجرا ائتمک اوچون سئچیلدی. اونو یاشیل حرکته قارشی بیر پادزهر کیمی ایجتیماعی گؤزلنتیلرین یارانماسینین قارشیسینی آلماق اوچون گتیردیلر.”
جناب لسانی روحانی حاکیمییتینین ماهییت اعتیباری ایله اؤنجەکی حؤکومتلرله فرقلنمەدییی و عئینی سیاستلری آنجاق باشقا بیر فورمادا یوروتدویونو وورغولاییب: ”حسن روحانی اصلینده سابق پرئزیدئنتلر هاشمی رفسنجانی، محمد خاتمی و احمدی نژاد حؤکومتلرینین یوروتدویو سییاستلری بیر آرایا گتیرەرک هامیسینی بیر یئرده تطبیق ائدیر،” دئیه او بیلدیریب.
آمئریکانین سسی/ علیرضا قولونجو
بو یازی یوردنت طرفیندن عرب الیفباسینا کوچورولموشدور
