ساوالان پورت: زینداندا ایللرین یئنیله‌ین آزربایجان موباریزلرینی اونوتمادیق!
بو گون یئنی ایلدن و طبیعتین جانلانماسیندان هابئله آزربایجانیمیزین و تورک دونیاسینین ائسکی بایراملاریندان اولان ارگنه کون بایرامیندان دانیشماق مومکوندور، آنجاق بونلاردان یازماق و دانیشماقدان اؤنملی اولان بیزه آذربایجانلی میللی فعاللاریمیزین دوستاقدا بو یئنی ایلین قارشینا چیخمالاریدیر.
اونلار آذربایجان میلتینین دوغال هاقلاری اوغروندا دینج شکیلده موباریزه آپاریب اینسان حاقلارینی ایران آدلانان اؤلکه‌ده گونئی آذربایجان میللتینه تطبیق اولونماسینی طلب ائتمیشلردیر. نه ایسه بو گون ایران آدلانان اؤلکه‌نین تئهران حاکیمیتی آذربایجان میلتینین ایبتیدائی و طبیعی حاقلارینی بئله وئرمه‌یه حاضیر اولماییر و هر طورلو کیملیک،دیل،کولتور و س. اوغروندا فعاللیق آپاران میللی فعاللاریمیزین قارشیسیندا شیددتلی تپکی گؤستریب اونلاری یاخالاییب توتوقلاییر، ایشگنجه ائدیب و اوزون مودتلی عدالتسیزجه‌سینه حبسلره معروض قویورلار.
بو گون یئنی ایلین ایلک گونو اولورسا بئله بیر چوخ گونئی آزربایجان مدنی فعالی عدالتسیزجه‌سینه وئریلمیش ایران محکمه‌لرینین حبس جزاسینی چکمکده‌دیرلر. بو اساسلارا دایاناراق بو گون آزربایجان میلتینین سعادتی و گلیشمه‌سی اوغروندا جانلاریندان و راحات یاشاملاریندان کئچیب هزینه وئرن ایگیدلردن دانیشماغی هر ندن اوستون توتماقداییق. میللی فعاللاریمیز یئنی ایلی اؤز عاییله لرییله بیرلیکده و بایرامین شنلیگینده اونلارلا ایشتیراک ائتمه‌لری عوضینه بوگون ایران حبسخانالاریندا ساخلانیلیب آزادلیقدان محروم ائدیلمیشلر.
بو دیرلی و اوجا اینسانلارین حاقینی سؤزسوز کی میلتیمیز ایتیرمیه‌جک و بیر گون اؤولادینی باغرینا باساجاقدیر. آما او گون یقین کی آزربایجانیمیزین آزادلیق گونو اولاجاقدیر و گئرچک بایرامیمیزی او گون بیرلیکده قوتلایاجاغیق. شوبهه‌سیز هر میلتین آزادلیق گونو اونون اوچون اصل بایرام حساب اولونمالیدیر،چونکی آزادلیقدان اؤنملی بیرشئی اولمادیغینین قناعتیندگیک.
بو گون هر کسه آزادلیغین نه قدر اؤنملی اولماسی بللیدیر. آزادلیق اولونجا ریفاه و سعادتی اؤزو ایله او توپلوما داشیییب گتیریر. آنجاق گونئی آزربایجانیمیزین آزادلیق گونو هر بیر آزربایجانلینین ،اؤز میللی موقددراتینی تعیین ائتمه گونو اولاجاغینی دوشونمکده ییک.
ایران ایسلام جومهوریتینین جومهور باشقانی اولان روحانینین سئچکیلردن اؤنجه آزربایجانلیلارا وئردیگی ودلرین هئچ بیریسینین حیاتا کئچیریلمه‌سی اوغروندا آددیم گؤتورولمه‌ییب، ترسینه گؤروروک کی اولوسلار آراسی آنا دیلی گونونده کوتلوی شکیلده توتوقلامالار باش وئریر و بودا مرکزی حاکیمیتین موحافیظه کارلیق باخیشینین هئچده دییشیلمه‌سینین آچیق فاکتیدیر.
سونوندا یئنی ایل بایرامینی بوتون آزربایجان میللتینه قوتلو اولسون دئییب و بو یئنی ایلده بوتون سیاسی توتساقلارین اؤزللیکله گونئی آزربایجانلی میللی فعاللاریمیزین اؤزگور بوراخیلماسی و میللتیمیزه قارشی تضییق لرین قالدیریلماسینی آرزولاییریق.
باش یازار | ساوالان پورت خبر- یوروم وئب سیته‌سی
