دیل بیر ایله تیمشیم آراجی اولماسینا باخمایاراق، توپلوملارین میللی کیملیکلرینین اولوشماسیندا و بیچیملنمه سینده اؤنملی رول اویناماقدادیر. آیریجا دیل، کیملیک اولقوسونا سورکلیلیک قازاندیرماقدادیر. توپلوملار میللتلشمه سورجلرینده ائدیندیکلری دیل ایله اؤز کیملیک و وارلیقلارینی ایفاده ائدیرلر. یعنی توپلوم کولتورونون نسیللردن نسیللره دوامیندا دیلین دانیلماز بیر ائتکیسی واردیر. دیل کیملیک ایله ایچ ایچه اولودوغو اوچون، میللتلرین کیملیکلرینی یوخ ائتمک اوچون اؤزلیکله دیل مسئله سی اوزریندن حرکت ائدیلر.

بیلیندیگی کیمی آزربایجان میللی حرکتی ده دیل مرکزلی بیر حرکتدیر. بو حرکتین چکیردگینی دیل اولوشدورماقدادیر. تورک دیلی نین رسمیت تاپماسی و اوخوللاردا اوخودولماسی بو حرکتین اورتایا چیخیش و سورکلیلیگینده اؤنمی چوخدور. اونا گؤره ده دیل و آنادیلی موضوعلاری میللی حرکتین هر زامان گوندمینده اولموشدور. میللی حکومتین باشچیسی پیشه وری دئمیشکن آنا دیلی بیزه آنا سوتوندن داها اؤنملیدیر. بلکه ائله اونون اوچون فارس شونیستلری ایلک باشدا بیزیم دیلیمیزی تحریف ائتمک ایسته میشلردیر و بو سیاستلرینی هله ده دوام ائتدیریرلر. آزربایجان تورکلرینین آنا دیلی اولان تورک دیلی یئرینه قوندارما آذری دیلی تئوریسینی یاراداراق بیزیم کیملیگیمیزین ان اؤنملی پارچاسی اولان دیلیمیزی و داها سونرا دا کولتور و مدنیتیمیزی یوخ ائتمک ایسته میشلردیر.

اگر کیملیگیمیزی قوروماق ایسته ییرسک، گرک آنادیلیمیزه صاحیب چیخاق. حاکیمیتلر، حاکم اولدوقلاری میللتلرین دیللرینی قوروماق و یاشاتماقلا یوکوملودورلر. اگر بو حاکمیت و بو حاکمیت ایچینده کی ذهنیتلر بیزیم آنادیلیمیزی نه تکجه قوروماق ایسته مه یرلر، بلکه اونون یوخ اولماسی و یوزلاشماسی اوچون االریندن گلنی ائدیرلر، دئمک بو حاکمیت بیزیم حاکمیت دئییلدیر. اگر حاکمیت و بونا بنزر ذهنیتلر بیزیم دیلیمزی یوخ ائتمک اوچون فعالیت ائدیرلرسه، بیز ده اؤز آنادیلیمیزین قورونماسی اوچون دیرنیش گؤسترمه لییک.

آنا دیلمیزین یازیب اوخوماسینی اؤیرنرک و عینی زاماندا اؤیردرک اؤز میلی کیملیگیمیزی قورومالییق. خصوصی ایله مجازی دونیاداکی یازیشمالاریمیزدا و سوسیال شبکه لرده آنا دیلیمیزده یازمالییق. اینترنت سایتلاریمیز تورک دیلینده یازیلار یایاراق دیلیمیزین و کولتوروموزن یوخ اولماسینین قارشیسندا دورمالیدریلار.

آزربایجان میللی دیرنیش تشکیلاتی اولاراق، دونیا آنادیلی گونونو تبریک دئییب، اعلان ائدیریک کی بیزه هر گون آنا دیلی گونو اولمالیدیر. هر گون دوشونمه لییک کی دیلیمیزین قورونماسیندا و سورکلیلیگینده نه ایشلر گؤردوک. حاکمیتین یالانجیل و آلداتیجی سؤزلرینه اینامیریق و آنا دیلیمیزین آزربایجان تاریخی تورپاقلاریندا رسمی اولماسی اوچون مجادله میزه دوام ائده جه ییک.

آزربایجان میللی دیرنیش تشکیلات

02 12 1392