ایران ایسلام جمهوریتی نین حاکیملری بیر داها نه قدر گووه نیلمیز اولدوقلاری هر کسه گؤستردیلر. بیر طرفدن ایرانداکی میللتلرین دیللرینی اوخوللاردا اوخودولاجاغی وعده سینی وئریرکن، باشقا بیر طرفدن ده اؤز آنادیللرینی دونیا انادیلی گونو مناسیبتی ایله عزیزله مک ایسته ین اونلارجا آزربایجان میللی فعالینی توپلو شکیلده توتوقلاماقدادیر. دئمک او یالانجی گولوشلرینین آرخاسیندا آزربایجان تورکلرینه قارشی نفرت بسله مکده دیرلر. حاکمیت، اونلارجا تانینمیش آزربایجان میللی فعالی آغیر شکیلده و زورلا توقوقلایاراق، اصلینده اؤزلرینین گرچک اوزونو گؤستریر. سؤزده دئموکراسی دن دانیشیرلار، آما ان کیچیک مدنی حرکتی تحمل ائده بیلمیرلر. سؤزده ائتنیکلرین ایستکلرینه اؤنم وئرمک ایسته ییرلر، اما اونلارین میللی فعاللارینی شکنجه ائدرک، توتوقلاییرلار.

آزربایجان میللی حرکتی ماهیتی اعتباری ایله مدنی و سیویل اولاراق یولونا و مجادله سینه دوام ائده جکدیر. ایران حاکمیتی یاخشی بیلمه لیدیر کی بو حرکتین فعاللارینی توتوقلایاراق و حتی اوزن مدتلی حبسلره محکوم ائده رک قاباغینی آلابیلمه سی ایمکانسیزدیر. چونکو بو حرکت ان ابتدایی اینسان حاقلارینی الده ائتمه حرکتیدیر. اونلارجا میللی فعالیمیزین اهر شهرینده توتوقلانماسی، بلکه بو یئنی ایش اوستونه گلن حاکمیته گوونمک ایسته ینلر اوچون ده بیر پیام اولار. او میللی فعاللاریمیز یاسادیشی هئچ بیر ائیلمه قاریشمادان، ساده جه دونیا آنادیلی گونونو عزیزله دیکلری اوچون سایغیسیز شکیلده توتوقلانمیشلار.

آزربایجان میللی دیرنیش تشکیلاتی طرفیندن بو یاسادیشی توتوقلامالاری محکوم ائدر، تئزلیکله آزاد بوراخیلمالارینی آرزولاییریق

آزربایجان میللی دیرنیش تشکیلاتی نین بیرینجی دبیری

داوود توران

02 11 1392